Aqtóbe qalasynyń 2050 jylǵa deıingi damý jospary bekitildi
AQTÓBE. KAZINFORM – Aqtóbe qalasynyń 2050 jylǵa deıingi damý jospary bekitildi. Onda áýejaıdy Nurbulaq-1 aýyly mańyndaǵy jańa alańǵa kóshirý qarastyrylǵan. Al qalanyń eski bóligindegi Máskeý jáne Qurmysh aýdandaryndaǵy eski úıler súrilip, 5-8 qabatty úıler boı kóterýi múmkin.
Aqtóbe qalasynyń qazirgi bas jospary QR Úkimetiniń 2016 jylǵy 31 qazandaǵy № 643 qaýlysymen bekitilgen. Bıyl jańasy bekidi. Túzetýler kezinde 2022 jyl qosa alynyp, 2050 jylǵa deıingi kezeń qamtyldy. Bastapqy kezeń 2022 jyl bolsa, 2030 jyl qurylystyń birinshi kezegi, al 2050 jyl eseptik kezeń bolyp bólingen. Tarqatsaq, 2022 jyly qala halqynyń sany 523,7 myń adam bolǵan. Al 2030 jyly 637 myńǵa jýyqtaıdy, 2050 jylǵa qaraı 950 myń adam bolady.
«Jańa bas jospardyń jobalyq usynysynda eski úı qurylystaryn buzý jáne olardyń ornyna kópqabatty zamanaýı turǵyn úıler salý qarastyrylǵan. Máskeý aýdanyndaǵy 85 ga aýmaqqa 920 myń sharshy metr, Qurmysh aýdanyndaǵy 118 ga aýmaqqa 1 275 myń sharshy metr 5-8 qabatty kóppáterli úılerdi salý kózdelgen. Bas jospardaǵy negizgi basymdyq – turǵyndarǵa jaıly ortany qalyptastyrý. Júrgizilgen taldaý nátıjelerine sáıkes jobada «Almaty» ákimshilik aýdany úshin qalanyń ońtústik-shyǵys bóligine, «Astana» ákimshilik aýdany úshin soltústik-batys bólikke káriz-tazartý qurylystaryn salý usynylady. Jalpy ónimdiligi táýligine 350 myń m³. Sonymen qatar, árbir ákimshilik aýdan úshin jalpy aýdany 67 ga bolatyn 2 jańa qatty turmystyq qaldyqtar polıgonyn jáne qoqys óńdeý zaýytyn salý josparlanyp otyr», - dep habarlady Aqtóbe oblystyq Qurylys, sáýlet jáne qala qurylysy basqarmasy.
Al Á.Moldaǵulova atyndaǵy halyqaralyq áýejaıdy Nurbulaq-1 aýyly mańyndaǵy jańa alańǵa shyǵarý usynylady. Al Aqtóbe qalasynyń tórt buryshynda aınalma jol qalaǵa soqpaı qozǵalýǵa múmkindik beredi.
«Dımash-arena, sheteldik týrısterdi tartatyn biregeı obektileri bar etnomádenı saıabaq, folklorlyq aýyl, «Astana-arena» úlgisindegi olımpıada stadıony jáne t.b. salynady. Etnomádenı saıabaqty qurý jáne ulttyq óner túrleriniń ortalyǵyn qalyptastyrý Bas jospardyń eń mańyzdy usynystarynyń biri. Elek ózeni jáne Aqtóbe sý qoımasy qıylysy aýdanynda saıabaqtar men skverler júıesi bar rekreatsııalyq aımaqty qalyptastyrý usynylady. Ol oqýshylar saraıyn, fılarmonııany, pansıonattar men demalys úılerin, dendrosaıabaqty, ınnovatsııalyq tehnologııalar saıabaǵyn, sport saıabaǵyn qamtıdy. Sazdy sý qoımasy aýdanynda golf saıabaǵy, «Sazdy» orman saıabaǵy bar Sazdy rekreatsııalyq-landshaftyq aımaǵyn qurý usynylady», - dep jazylǵan.
