Aqtóbe qalasyndaǵy gaz tapshylyǵy 1,6 mlrd tekshe metrge jetken
Aqtóbe oblysynyń ákimi Ashat Shaharov óńir ortalyǵyndaǵy gaz tapshylyǵy máselesi qalaı sheshiletinin aıtty, dep habarlaıdy Kazinform.
«Aqtóbe qalasynda jylyna 1,6 mlrd tekshe metr gaz tapshylyǵy baıqalyp otyr. Qoldanystaǵy magıstraldi gaz qubyrlarynyń qystaǵy júktemesi 175 paıyzǵa deıin jetti. Bul máseleni sheshpeı óńirde iri ınvestıtsııalyq jobalardy iske asyrý, turǵyn úıler salyp, bıznesti damytý qıynǵa túsedi», - dedi Ashat Shaharov.
Onyń sózinshe, qaladaǵy gaz máselesin aldaǵy jarty ǵasyrǵa sheshýge bolady.
«Osy tapshylyqty joıý úshin Buqara-Oral gaz qubyrynyń úshinshi jelisi tartylady. Qajetti qarajat tolyqtaı qarastyrylǵan. Keler jyly qurylys jumystaryn aıaqtaý josparlanǵan. Bul oblys ortalyǵynda gaz tapshylyǵyn aldaǵy 50 jylǵa sheshýge múmkindik beredi», - dedi ákim.
