Aqtóbe qalasynda jer kezegine turǵan adam sany 180 myńǵa jýyqtap qaldy
AQTÓBE. KAZINFORM — Oblys ortalyǵynda jer ýchaskelerin bólý 2022 jyldan bastap ýaqytsha toqtatyldy. Sebebi ınfraqurylymy tartylǵan bos jer telimi qalmady.
Aqtóbe qalasynda úı salýǵa bólinetin 10 sotyq jerge suranys joǵary. Qazirgi kezde 177 917 adam kezekte tur. Alaıda sý, jaryq, gaz jelisi tartylyp, joly salynǵan jer joq. Sondyqtan da 2022 jyldan beri jer berý ýaqytsha toqtatyldy.
— Negizgi sebep — ınjenerlik-kommýnıkatsııalyq ınfraqurylymmen qamtamasyz etilgen bos jer teliminiń jetkiliksizdigi. Qazirgi tańda ákimdik jańa turǵyn alaptardy qalyptastyrý jáne olardy ınjenerlik ınfraqurylymmen qamtamasyz etý baǵytynda jumys júrgizip jatyr. Atap aıtqanda, bos jer ýchaskeleri anyqtalyp, olar boıynsha egjeı-tegjeıli josparlaý jobalary ázirlenýde. Budan keıin sý, elektr jelileri jáne jol ınfraqurylymyn tartý kózdelgen. Atalǵan jumystar 2023–2029 jyldarǵa arnalǵan turǵyn úı-kommýnaldyq ınfraqurylymdy damytý tujyrymdamasy aıasynda kezeń-kezeńimen júzege asyrylady, — dep habarlady Aqtóbe oblystyq jer qatynastary basqarmasy.
Tujyrymdaǵa sáıkes 2026-2028 jyldar aralyǵynda turǵyn alaptardaǵy ınjenerlik-kommýnıkatsııalyq ınfraqurylymdy damytýǵa qarjy qarastyryldy. Buryn bólingen jer ýchaskelerin ınjenerlik ınfraqurylymmen tolyq qamtamasyz etý jáne jańa turǵyn alaptardy jer ýchaskelerin berýge daıyndaý josparlanǵan. Endi jer telimi daıyn bolǵannan keıin ǵana beriledi.
Eske salsaq, byltyr Aqtóbe qalasynda 167 myńǵa jýyq adam jer telimi kezeginde turǵany belgili. Bir jyl ishinde taǵy 10 myń adam ótinish bergen.
