Aqtóbe qalasynda jabaıy saýda máselesi qalaı sheshiledi

Aqtóbe qalasyndaǵy Ortalyq bazar mańynda túrli jemis, kıim satyp júrgen saýdagerler búgin oblys ákimi Ashat Shaharovpen kezdesýdi surady. Olar kóktemde shaǵym aıtyp, kómek suraǵan kezde qalalyq ákimdik jer bólip, oryn daıyndaıtynyn habarlady. Sodan beri eki aı ótip, jumys tıisti nátıjesin bermegen.

— Naýryz aıynda bazar aınalasynan oryn qarastyrylatyny aıtyldy. 14 mamyr bolsa da jumys aıaqtalmady. Bala-shaǵamyz bar, tamaǵymyz bar. Áıelderdiń kóbi kópbalaly, erekshe bala tárbıelep otyrǵan ana. Olardyń birneshe nesıesi bar. Baspanasy da joq. 3-4 aıdan beri ákelgen zattarymyz shirip ketti. Bir emes, birneshe aıyppuldan bar, — dedi saýdagerler. 

Olardyń aıtýynsha, munda barlyǵy 80 saýdager bar. Onyń teń jartysy jemis-jıdek satsa, qalǵany kıim-keshek saýdalaıdy. Ákimdik usynǵan saýda oryndary kishkentaı ári joldyń ortasynda ornalasqan.

Aqtóbe qala ákiminiń baspasóz qyzmetiniń habarlaýynsha, kóshe boıynda saýda jasap otyratyn adamdardy jınap, birneshe ret túsindirý jumysy júrgizilgen. Sonymen birge zańdy saýda jasaý úshin bir emes, eki oryn usynylǵan.

— Kıim-keshek satýshylarǵa «Astana» saýda úıi janynan 30 oryn berildi. Olar 10 kún boıy aqysyn tólemeıdi. Keıin jalǵa alý quny kúnine 1 myń teńge bolady. Biraq kásipkerlerdiń ózderi ol jerden bas tartyp otyr. Olar jaıma bazardyń qyzmetin jalǵastyryp, jaıaý júrginshiler jolynda zańsyz ári aqysyz saýda jasaýdy surady. Sonymen birge qazir J. Dosmuhameduly kóshesi boıynan 70 oryndyq pavılon salynyp jatyr. Qurylysy shamamen 2-3 aptada aıaqtalady. Qurylys bastalmas buryn jerdi zańdastyrý, ruqsat alý rásimderi júrgizildi. Jaıma bazarda saýda jasaǵan kásipkerler pavılon qurylysynyń aıaqtalýyn kútedi. Bul jerden de bas tartyp jatqan adamdar bar, — dep habarlady Aqtóbe qala ákiminiń baspasóz qyzmeti.

Aıta keteıik, Qonaevta jabaıy saýda úshin 2,5 mln teńgeden astam aıyppul salyndy. Munda jabaıy saýda orny saıabaqqa aınaldy.