Aqtóbe qalasynda tasqynǵa qarsy kúres jumystaryna jarty mlrd teńgege jýyq qarjy bólindi
AQTÓBE. KAZINFORM – Qalada ózen jaǵalaýyn bekitý, sý burý arnalaryn salý jáne tazartý jumystaryna 469 mln teńge bólindi.
Aqtóbe qalasynda barlyǵy 23 is-shara atqarylady. Kóbi baý-baqsha ujymdary aýmaǵyndaǵy ózen jaǵalaýyn bekitýge arnalǵan jumys. Máselen qaladaǵy «Romashka» saıajaı aýmaǵyndaǵy Tamdy ózeniniń jaǵalaýy bekitildi. Onda merdiger 250 metrge qum úıdi. Shyǵys, Ólke, Dýman turǵyn alaptary men «Gorprokýratýra», «Zoovetsnab-2», «Vodosnabjenets», «Lokomotıv deposy-8», «Geolog-4» baý-baqsha ujymdary, Quraıly turǵyn alabynda kóktemgi sý tasqynynyń aldyn alý úshin sý baǵytyn burý jumystary júrgizildi. Peschanka, Jińishke ózenderinde de dál osyndaı jumys atqaryldy.
- Ońtústik-Batys-2, Sazdy-2, Tańsholpan, Baýyrlastar-5, Aqshat turǵyn alaptarynda sý burý jumysy atqarylyp, keıbirinde jumys aıaqtalyp qaldy. Sonymen birge «Geofızık-2», «Avıator-5» baý-baqsha ujymdarynda dál osyndaı jumys atqaryldy. Quraıly turǵyn alabynda sý ótkizgish qubyr ornatylyp jatyr. Bul jumystarǵa bıýdjetten 469 mln teńge bólindi,- dedi Aqtóbe qalasy ákiminiń baspasóz hatshysy Aıgúl Baımenova.
Aqtóbe qalasy Almaty jáne Astana aýdany ákimderi qazirgi kezde turǵyndarmen kezdesý ótkizip jatyr. Kezdesý kezinde baý-baqsha, turǵyn alap turǵyndary sý tasqynyna qarsy jumystar týraly da surady.
- Qala mańyndaǵy turǵyn alap mańynda ornalasqan ózen jaǵalaýlarynda bekitý jumystary júrip jatyr. Sonymen birge sý ótkizý arnalary tazartylady. Bul jumystar jeltoqsan aıynyń ortasyna deıin aıaqtalady. Basty maqsat – sýdy burý,- dedi Almaty aýdanynyń ákimi Rústem Óteshov.
Aıta keteıik, Aqtóbede 22 eldi mekendi sý basý qaýipi bar. Sý tasqynynyń aldyn alý jumystaryna bıyl 6,5 mlrd teńge bólindi.
Al el boıynsha sý basý qaýpi bar 1242 eldi meken anyqtaldy. Injenerlik jumystar jospary 800-den astam is-sharany qamtıdy.