Aqtóbe qalasynda tasqynǵa qarsy kúres jumystaryna 600 mln teńgeden astam qarjy jumsalady

Aqtóbe oblysy aýmaǵynda kóktemgi sý tasqynyna qarsy kúres jumystary jalǵasyp jatyr. Qazirgi ýaqytta kóshedegi qar shyǵarylyp jatyr.

— Aqtóbe qalasyndaǵy Máskeý, Qalalyq sút zaýyty, Malyshka, Shanhaı, Qurmysh aýdandary men qalanyń eski bóliginen qar shyǵarylyp jatyr. Qarasha aıynan beri arnaıy polıgonǵa 364 myń tekshe metr qar tasymaldanǵan. Sonymen qatar aryqtar men kanaldar qar men muzdan tazartylyp jatyr. Qaladaǵy erigen jáne jaýyn-shashyn sýlaryn burý júıesi tolyq retke keltirildi. Onyń jalpy uzyndyǵy 61,6 shaqyrym bolsa, 55 shaqyrymy ashyq aryq, 6,6 shaqyrymy jabyq jeli. Barlyq 45 drenajdyq-jınaqtaý qudyǵy men 5 sorǵy stantsııasy jumysqa daıyn. Oblys ákimi Ashat Shaharov Qarǵaly turǵyn alabyndaǵy Peschanka ózeni boıynda júrgizilip jatqan jaǵalaýdy bekitý jumystarynyń barysymen tanysty. Sý tasqyny kezeńine daıyndyq aıasynda Peschanka ózeniniń 800 metr aýmaǵyndaǵy arnasy keńeıtilip, tereńdetildi, qurǵaǵan aǵashtardan tazartylyp, jaǵalaýy bekitildi. Jumystardyń jalpy quny 26,3 mln teńgeni quraıdy, — dep habarlady Aqtóbe oblysy ákiminiń baspasóz qyzmeti.

Aqtóbe qalasynda sý tasqynyna qarsy kúres jumystaryna 639 mln teńge bólingen. Onyń teń jartysynan astamy sý tasqynyna qarsy kúres jumystaryna jumsalady. Al qalǵan bóligi sý sorý jumystaryna baǵyttalady. Bıyl 120 assenızator, eki jyljymaly sorǵy stantsııasy, motopompalar jáne arnaıy tehnıka jumyldyrylmaq. Sondaı-aq 10 myń tekshe metr ınertti materıal men 15 myń qap daıyndalǵan.

— Konkýrs qorytyndysy boıynsha muz jarý jumystaryn júrgizetin merdiger retinde «QazTechEngineeringGroup» kompanııasy anyqtaldy. Jumystar Elek ózeniniń eki ýchaskesinde júrgiziledi, — dep habarlady baspasóz qyzmeti.

Aıta keteıik, Aqtóbedegi iri sý qoımalarynyń teń jartysynan astamy bos tur. Qazir Qarǵaly, Sazdy, Aqtóbe sý qoımalary sý qabyldaýǵa daıyn. Úsheýinde 300 mln tekshe metrden astam bos oryn bar.