Aqtóbe qalasynda tasqyn saldaryn joıý jumysy osy aptada bastalady
AQTÓBE. KAZINFORM – Sý tasqynynan keıingi qalpyna keltirý jumystaryna shamamen 100-150 mln teńge qajet. Osy aptada qalanyń qaq ortasyndaǵy Sazdy ózeni boıyndaǵy temir qorshaýlar men júrginshiler joly jóndele bastaıdy.
Aqtóbe qalasy boıynsha sý tasqyny kezinde sý burý jumystary júrgizildi. Sol kezde birneshe jol jyrylyp, bógetter buzyldy.
- Sý tasqyny kezinde birqatar joldardy buzyp, sý ótkizýge týra keldi. Sýdyń áserinen jol jabyndysy otyrǵan joldar da bar. Qaladaǵy Ońtústik aınalma jolǵa sý ótkizgish kubyryn, Mustafa Shoqaı kóshesi ýchaskesine temirbeton aryq, Qanaǵat turǵyn alabyna sý ótkizý qubyryn, K. Muńaıtpasov kóshesi, Avıator-Samal ýchaskesinde temirbeton aryq, 12 shaǵyn aýdandaǵy aınalma jolǵa sý ótkizý qubyryn ornatý josparlanyp otyr. Sonymen birge Saıa, Maǵadjan turǵyn alabyna sý ótkizý qubyrlary salynady. Bul jumystarǵa shamamen 100-150 mln teńge qarajat suralady,- dedi Aqtóbe qalasy ákiminiń baspasóz hatshysy Aıgúl Baımenova.
Onyń aıtýynsha, 11 jáne 12 shaǵyn aýdandy boılaı aqqan Sazdy ózeniniń jaǵalaýynda búlingen jerler bar. Munda sel júrgen kezde ekskavatorlarmen jaǵaǵa shyǵarylyp, temir qorshaýlar men jaıaý júrginshiler joly búgindi. Qazirgi kezde trotýar tastary shashylyp, keıbir tusta temir qorshaýlar ornyna bos tur.
- Sazdy ózenin qaıta bógeý jáne de sol aýmaqtaǵy qorshaýlar men búlingen trotýar plıtkalaryn qaıta qalpyna keltirý jumystary osy aptada bastalady,- dedi Aıgúl Baımenova.
Aqtóbe qalasynda tasqyn qaýpi seıilip, qazir turǵyndardyń kóbi úıine oraldy. Al úıin syz basqany turǵyndar áli de evakýatsııalyq pýnktterdi panalap otyr. Bul oryn mektepterde emes, joǵary jáne arnaýly oqý oryndarynyń jataqhanalarynda ornalasqan. Barlyǵy 7 evakýaktsııalyq pýnktte 1074 adam bar, onyń ishinde 480-i bala.
Aqtóbe qalalyq máslıhatynyń tóraǵasy Anar Darjanovanyń aıtýynsha, tabıǵı jáne tehnogendik sıpattaǵy tótenshe jaǵdaılardy joıý úshin rezervten 7 mlrd teńgege jýyq qarjy qarastyryldy.
