Aqtóbe qalasynda sý sorý jumystary júrip jatyr
AQTÓBE. KAZINFORM - Aqtóbe qalasynda sý sorý jumystary júrip jatyr. Bir táýlikte Almaty aýdany boıynsha 300-den astam ótinish tústi.
Aqtóbe qalasy boıynsha sý tasqynyna qarsy shtab jumys istep jatyr. Kesheden beri Eset batyr turǵyn alabynyń 2-yqsham aýdanynda qatynas qıyndady.
- Eset batyr turǵyn alaby 2-yqsham aýdany mańyna kesheden beri sý jınalyp jatyr. Keshe bir ǵana jerden 1800 tekshe metr sý soryldy. Qazir de motopompa qosylyp, assenızatorlar júr. Sý jınaıtyn jerasty ótkizý arnasy qatyp tur. Erip, sý júrip ketse, problema sheshiledi,- Aqtóbe qalalyq TJB bastyǵy Azamat Nagımov.
Aqtóbeniń Almaty aýdanynda barlyǵy 44 turǵyn alaby bar. Keshe turǵyndardan 300-den astam shaqyrtý tústi.
- Barlyq turǵyn alapqa mamandar bekitildi. Olar shaqyrtýǵa baryp, aldyn ala qaraıdy. Rasymen qaýip tónse, qum tóselip, arnaıy tehnıka jiberiledi. Bizge Zarechnyı, Eset batyr, Órleý, Qýraıly, Aqjar-1, Aqjar-2, Prıgorodnyıdan kómek surady. Sý irgetasyna kóterilgenimen, eshkimniń úıine kirmedi,- dedi Aqtóbe qalasy Almaty aýdanynyń ákimi Aslanbek Shúıinshalıev.
Aqtóbe oblystyq TJD-i «Qazgıdromet» RMK AOF málimetterine súıenip, 25-28 naýryz kúnderi kúndiz jańbyr jaýatynyn habarlady. Aýa temperatýrasy orta eseppen 0-2 gradýs sýyq, kúndiz +3+5 gradýs jyly bolady. Al 29 naýryzda kóshpeli bult bolyp, túnde qar aralas jańbyr jaýyp, kóktaıǵaq bolady.
