Aqtóbe qalasynda shybyn-shirkeı qaptap ketti
AQTÓBE. KAZINFORM – Qala turǵyndary usaq shybynnyń qaptap ketkenin aıtyp, shaǵym túsirip jatyr. Al ákimdik ýlaý jumysyna 44 mln teńge bóldi.
Aqtóbe qalasynda masa men túrli shybyn-shirkeı, kemirgishten ýlaý jumysy mamyr aıynda bastady. Áli kúnge deıin jalǵasyp jatyr. Alaıda qala kóshelerinde, turǵyn úı aýlalarynda usaq shybyn qaptap ketti.
— Merdiger jumysty 4 mamyrdan bastady. Sodan beri dezınsektsııa jáne deratızatsııa jumystary júrip jatyr. Jaz aıynda 4 myń gektardan astam aýmaqta 8 ret ýlaý jumysy isteldi. Eki ret kemirgishterge qarsy ýlaý jumysy júrgizildi. Bul 175 ga aýmaqty qamtydy. Sonymen birge turǵyn alaptar, qala kósheleri men saıabaq, alleıalardaǵy jasyl jelekke arnaıy ý shashyldy. Jasyl jelekti ýlaý jumysy 1700-den astam gektardy qamtydy, — dedi Aqtóbe qalasy ákiminiń baspasóz qyzmeti.
Ýlaý jumysy kezine traktor, arnaıy búrikkish, sý tasıtyn kólik, dron da qoldanylǵan.
— Jańbyr jaýyp, artynan kún ysyǵanda ylǵal kóterilip, shybyn-shirkeı kóbeıip tur. Sonymen birge ýlaý jumysy kezinde olardyń kóshýi baıqalady. Qazirgi kezde Almaty jáne Astana aýdanynyń ákimdikteri merdigerlermen birge kóshelerge, belgili bir aýmaqtarǵa monıtorıng júrgizip jatyr. Monıtorıngten keıin qosymsha ýlaý jumysy júrgiziledi. Ásirese adam kóp júretin jerge basymdyq beriledi, — dep habarlady Aqtóbe qalasy ákiminiń baspasóz qyzmeti.
Buǵan deıin ǵalym Pavlodardyń keıbir aýyldarynda shybyn-shirkeıdiń ne sebepti qaptap ketkenin túsindirdi. Onyń aıtýynsha, shybyn-shirkeıdiń barlyǵyn joıyp jiberý degen uǵym bolmaýy kerek.
Olardyń popýlıatsııasyn joıý múmkin bolǵannyń ózinde jándikterdiń ornyna basqa qansorǵyshtar keler edi.