Aqtóbe qalasynda qurban shalýǵa arnalǵan 4 oryn belgilendi

AQTÓBE. KAZINFORM – Qurban shalatyn 4 oryn qalanyń ár bóliginde ornalasqan. Sonymen birge onlaın tapsyrys bergen adamdardyń amanatyn taratý jumysyn meshitter uıymdastyrady. 

Aqtóbe qalasy boıynsha qunban shalý mal bazary men arnaıy mal soıý oryndarynda ótedi.

Mekenjaıy: 

1. Mal bazarynda ornalasqan «Esik» JShS-i men «Moldabekov» JK aýmaǵy. 

2. 41-razezdegi «Aıbek» AShÓK aýmaǵy.

3. Jańaqonys turǵyn alabyndaǵy 640 ýchaskede ornalasqan «Qasymov ı K» JK alańy. 

4. Raýan turǵyn alabyndaǵy «Jibek jol» bazar aýmaǵy.

Aqtóbede onlaın tapsyrys qabyldanady. Degenmen sońǵy kezde adamdar ózderi baryp, mal tańdap, etin taratady.

– «Aqtóbe qurban-2025» onlaın tapsyrys qabyldaý tetigi ashyldy. Onda qoı, eshki, sıyrǵa tapsyrys berýge bolady. Túıe kóp emes, sondyqtan tapsyrys joq. Qurban shalý kezinde vıdeoǵa túsirilip, jiberiledi. Qazir mundaı tapsyrys az. Tapsyrysty kóbine ózge óńirde júrgen kásipkerler beredi jáne muqtajdarǵa taratýymyzdy suraıdy. Qazir muqtaj adamdar tizimi jasalyp jatyr. Jetkeninshe taratamyz, - dedi Aqtóbe oblysynyń bas ımamy Amantaı Sadıev. 

Onyń aıtýynsha, qurban shalatyn oryndarǵa muqtaj adamdardy jınamaıdy, tek mekenjaıy boıynsha jetkizedi. 

Aıta keteıik, Qazaqstan musylmandary dinı basqarmasyna qarasty «Zeket jáne qaıyrymdylyq» qory Qurban aıt merekesi kezinde elimiz boıynsha qurban shalýǵa arnalǵan arnaıy oryndardyń tizimin usyndy.