Aqtóbe qalasynda quny 53,5 mlrd teńgege káriz tazartý qondyrǵysy salynady

Aqtóbe qalasynda jańa káriz tazartý qondyrǵysyn salýǵa Eýropa qaıta qurý jáne damý bankinen qarajat tartylady, dep habarlaıdy Kazinform. 

Bul týraly oblys basshysy Ashat Shaharov ortalyq kommýnıkatsııalar qyzmetinde ótken brıfıngide aıtty.

«Memleket basshysy jýyrda Aqtóbe oblysyna jumys sapary aıasynda ekologııa salasyndaǵy ózekti máselelerdi sheshý baǵytynda birqatar tapsyrma berdi. Bul máseleni sheshý maqsatynda jol kartasy ázirlendi. Ony daıyndaýǵa azamattyq qoǵam ókilderi, táýelsiz sarapshylar men ýákiletti memlekettik organdar tartyldy. Qujat ózekti ekologııalyq máselelerdi qamtıdy. Bul baǵyt boıynsha aldaǵy úsh jylda tıimdi sharalar qabyldanady», - dedi Ashat Shaharov.

Ákimniń aıtýynsha, Aqtóbe qalasyndaǵy káriz tazartý júıesi 80 paıyz tozǵan.

«Oblys ortalyǵynda jańadan tazartý qondyrǵylary salynady. Jalpy quny 53,5 mlrd teńge bolatyn jobany Eýropa qaıta qurý jáne damý banki qarjylandyrady. Búginde jobanyń tehnıkalyq-ekonomıkalyq negizdemesi ázirlenip, memlekettik saraptamadan oń qorytyndy alyndy. Qurylys-montajdaý jumystary kelesi jyly bastalady degen jospar bar», - deıdi oblys ákimi.