Aqtóbe qalasynda qoqys polıgonynan órt shyqty
AQTÓBE. KAZINFORM – Órt týraly habarlama búgin saǵat 06:15-te túsken. Qazir tótenshe jaǵdaılar qyzmeti men polıgonǵa jaýapty kompanııa jumysshylary órtti sóndirip jatyr.
Aqtóbe qalasynyń irgesindegi qoqys polıgonynan órt shyqty. Tótenshe jaǵdaılar qyzmetine habarlama túsken boıda birneshe tehnıka jiberildi.
- Qazir órt sharpyǵan aýmaqtyń aýdany – jarty gektar. Qalada qatty jel soǵyp tur. Jeldiń jyldamdyǵy sekýndyna 15 - 18 metrge jetti. Qatty jel órt sóndirý jumystary kezinde qosymsha qıyndyq týyndatty. Órtti sóndirýge oblystyq Tótenshe jaǵdaılar departamenti, «Taza Álem 12» JShS jáne jergilikti atqarýshy organdardyń kúshteri men quraldary tartyldy. Barlyǵy jeke quramnan 68 adam jáne 34 tehnıka birligi jumyldyryldy. Zardap shekkender joq. Qazirgi ýaqytta órtti sóndirý, onyń taralýyna jol bermeý jáne topyraqpen kómý jumystary júrgizilip jatyr, - dep habarlady oblystyq TJD baspasóz qyzmeti.
Buǵan deıin habarlaǵanymyzdaı, Aqtóbede bıylǵy órt shyǵyny 151 mln teńgege jetti. Oblysta bıyl 359 órt tirkeldi. Órttiń kóbi turǵyn úı sektorynda bolǵan.