Aqtóbe qalasynda qoqys alańdaryn tazartýǵa 300 mln teńge jumsaldy
AQTÓBE. KAZINFORM – Bárin de turǵyndar úıden shyǵaryp, dalalyqqa tastap ketken. Bul qoqysty jınaý úshin byltyr qala ákimdigi 300 mln teńge jumsady.
Byltyr ǵaryshtyq túsirilim kezinde oblys aýmaǵynda 155 qoqys orny anyqtaldy. Aqtóbe oblysy boıynsha ekologııa departamentiniń bas mamany-memlekettik ekologııalyq ınspektory Gúljaınar Abrahmanovanyń aıtýynsha, 142 ýchaskede tazalaý jumysy júrgizildi.
– Bıyl ǵaryshtyq túsirilimniń aqparaty áli berilmegen. Degenmen memlekettik ekologııalyq ınspektorlar reıd jasap, qala aýmaǵynan 10-nan astam jer ýchaskesin anyqtady. Bárinde qoqys jatyr. Jergilikti atqarýshy organdarǵa hat joldandy. Talap boıynsha olar aýmaqty tazartýy tıis. Negizi tazartý ýaqyty qoqys kólemine qaraı bolady. Keıde 2-3 aıǵa sozylyp ketýi múmkin, - dedi memlekettik ekologııalyq ınspektory Gúljaınar Abdrahmanova.
Aqtóbe qalasy ákiminiń baspasóz qyzmetiniń habarlaýynsha, byltyr ǵarysh túsirilimi kezinde anyqtalǵan qoqys alańdaryn tazartýǵa 300 mln teńge bólindi. Al bıylǵy málimet áli berilmedi.
– Bıyl 48 ýchaske tazartyldy. «Taza Qazaqstan» aktsııasy aıasynda senbilikter uıymdastyrylady. Ol kezde merdigerlerdiń tehnıkalaryn jumyldyryp, tazartyp jatyr. Bul jumys mamyr aıynyń sońyna deıin jalǵasady, - dep habarlady baspasóz qyzmeti.
Aıta keteıik, QR Ákimshilik quqyqbuzýshylyq týraly kodeksiniń 344-baby 2-bóligine sáıkes qoqysty arnaıy belgilenbegen orynǵa shyǵarǵan jeke tulǵalarǵa 50 AEK mólsherinde aıyppul salynady. Kodekstegi 344-baptyń 3-bóligine sáıkes qaldyqtardy tasymaldaý talaptaryn buzǵany úshin jeke tulǵalarǵa 40 AEK mólsherinde ákimshilik aıyppul qarastyrylǵan.
– Zańdy tulǵalar úshin aıyppul mólsheri kásipkerlik sýbektisiniń sanatyna qaraı budan da joǵary bolady. Qazirgi ýaqytta zańsyz qoqys oryndaryn anyqtaý jumystary kúsheıtildi. Polıtsııa qyzmetkerlerimen birge reıdtik jumystar júrgiziledi. Kináli tulǵalardy anyqtaý jáne jaýapqa tartý úshin polıtsııaǵa beınebaqylaý jáne drondar arqyly monıtorıng jasalýǵa usynys berildi. Adamdar qoqys shyǵarý nemese aǵyndy sýdy tógý faktileriniń kýágeri bolsa «102» nómirine nemese Ekologııa departamentiniń jaýapty qyzmetkeriniń 8-701-644-89-58 baılanys nómirine habarlasýǵa bolady, - dedi Gúljaınar Abdrahmanova.
Buǵan deıin habarlaǵanymyzdaı, aqtaýlyq qoǵam belsendisi Azamat Sársenbaev oblys aýmaǵyndaǵy qoqysqa toly aýmaqty beınejazbaǵa túsirip, ony áleýmettik jelide jarııalady. Beınejazbada dalada shashylyp jatqan polıetılen qapshyqtar men plastık bótelkelerdi, olardyń arasynda jaıylyp júrgen túıeni kórýge bolady.
