Aqtóbe qalasynda qoǵamdyq dárethana máselesi sheshilmedi
AQTÓBE. KAZINFORM – Qaladaǵy saıabaqtarda dárethana joq, keıbirinde ýaqytsha jumys istemeı tur. Jergilikti ákimdik dárethana salý jobasy endi qarastyrylǵanyn aıtty.
Aqtóbe qalasynyń halyq sany 600 myńnan asqanymen oblys ortalyǵyndaǵy úsh saıabaqta ǵana dárethana bar. Tuńǵysh Prezıdent saıabaǵy senimgerlik basqarýǵa berilip, kútimin jeke kompanııa mindetine alǵan. Al Trıatlon parki mańyndaǵy dárethana qazir jabyq tur.
– Trıatlon parkindegi dárethana eki jyldan beri bar. Ony senimgerlik basqarýǵa alǵan kompanııa óz qarajatyna salyp, uńǵyma qazdy, nasos ornatty. Alaıda byltyr qys aılarynda nasos aıazǵa shydas bermeı, jarylyp ketken. Bıyl jóndeý jumysy júrgiziledi. Sondyqtan dárethana jabylǵan. Qys aılarynda Trıatlon parkine kelýshiler, buqaralyq sportpen shuǵyldanýshylar sany azaıady. Olar sol ýaqytty paıdalanyp, jóndeımiz dep otyr, - dedi Aqtóbe qalasy ákiminiń baspasóz hatshysy Aıgúl Baımenova.
Onyń aıtýynsha, qazirgi kezde saıabaq qurylystarynda dárethana salý jumys qatar atqarylady. Máselen Qonys saıabaǵynda múgedekterge arnalǵan bóligi bar modýldik dárethana salynyp jatyr. Ózge oryndarda mundaı joq. Sonymen birge qazir Aqtóbe oblysy ákimdigi mańyndaǵy Abaı saıadaǵynda da dárethana jaramsyz kúıge túsken.
– Abaı saıabaǵynda turǵan dárethana tolyqtaı qaıta rekonstrýktsııalaýdy jáne kútip ustaýshy tazalyqshy, kúzet qoıýdy qajet etedi. Sebebi osyǵan deıin ony paıdalanǵan keıbir turǵyndar az ýaqytta ishin búldirip, sý keletin tetikterin syndyryp ketti. Bunyń bári bıýdjet qarajatyna tireledi. Sebebi bul saıabaq Ortalyq saıabaq pen Trıatlon park sekildi senimgerlik basqarýda emes. Kelesi jyly bul máseleni sheshý josparǵa engizildi. Al merekede jáne saıabaqtarda, qoǵamdyq oryndarda is-sharalar ótetin kúnderi jyljymaly bıodárethanalar mindetti túrde ornatylyp keledi. Odan bólek kelesi jyly modýldi dárethanalar ornatý josparlanady, - dedi Aıgúl Baımenova.
Aıta keteıik, keıingi kezderi ǵana elimizdegi qalalarda qoǵamdyq dárethana salý máselesi qozǵalyp keledi. Máselen Shymkentte shynydan jasalǵan qoǵamdyq dárethanalar iske qosyldy.