Aqtóbe qalasynda keıbir kópqabatty úıler jylytý maýsymyna daıyn emes

AQTÓBE. KAZINFORM — Kópqabatty úıler daıyndyq pasportyn alýy tıis. Ol úshin kommýnaldyq mekeme «bir tereze» qaǵıdaty boıynsha jumys istep tur.

Aqtóbe qalasy ákiminiń baspasóz qyzmetiniń habarlaýynsha, qazir oblys ortalyǵynda 2100 kópqabatty úı bar. Úıler páter ıeleriniń kooperatıvi, qyzmet kórsetý kompanııasy, múlik ıeleriniń birlestigi jáne qarapaıym seriktestik arqyly basqarylady.

— Búgingi kúni páter ıeleri kooperatıvi 49 kóppáterli turǵyn úıdiń jylý júıelerine aǵymdaǵy jóndeý jumysyn júrgizip jatyr. Sonymen birge 17 úıde kúrdeli jóndeý jumystary josparlanyp, jumys qolǵa alyndy. Úıge ortaq jylý jelisi jóndelgenimen páter ıeleri ishki qubyrlardy aýystyrmaıdy nemese dıametri kishkentaı plastık qubyr qoıyp alady. Onyń bári jylýdyń teńdeı berilýine kedergi. Páterdiń ishindegi jylý júıesin ózgertip, balkondy qosyp qoıady. Budan ózge kórshi páterlerge jylý jetpeı, qysta qınalady. Qazirden bastap osy jaǵdaılardy turǵyndarǵa eskertip jatyrmyz, — dedi Aqtóbe qalalyq turǵyn úı ınspektsııasynyń basshysy Aqnur Qazbaeva.

Aqtóbe qalasy boıynsha keıbir kópqabatty úıdiń basqarýshylary jumysty tolyq atqara almaı otyr. Máselen «Ilek» tutynýshy kooperatıviniń basqarýynda 11 úı bolsa, onyń ekeýi qysqa ázir emes. Sonymen birge «Mereı-E» PIK-niń basqarýyndaǵy 10 úıdiń úsheýinde jıi qıyndyq týyndaıdy.

— Qysta osy úı turǵyndary tarapynan birneshe shaǵym túsken bolatyn. Úı basqarýshylaryna osy máselelermen tez arada aınalysý týraly eskertildi, — dep habarlady Aqtóbe qalasy ákiminiń baspasóz qyzmeti.

Qazirgi kezde qaladaǵy kommýnaldyq mekemeler qysqa daıyndyq týraly qujat alý úshin «bir tereze» qaǵıdatyn iske qosty. Úı basqarýshylary telefon shalyp, onlaın da mamandardy shaqyryp, teksertip alýǵa bolady. Jylpy Aqtóbe qalasynda bıyl 6 shaqyrym jylý jelisin jańartý josparlanǵan. Oǵan 890 mln teńge jumsalady.

Eske salsaq, Aqtóbe jylý elektr ortalyǵy bıyl 13 qazandyqty jóndeıdi. Onyń 7-inde jumys aıaqtaldy. Sonymen birge 6 týrboagregattyń 4-i jóndeldi.