Aqtóbe qalasynda erigen qar sýyn táýlik boıy soryp jatyr
AQTÓBE. KAZINFORM — Aqtóbe qalasynda erigen qar sýyn sorýǵa 150-ge jýyq assenızator jumyldyryldy. Búginde 104 myń tekshe metr sý soryldy.
Sońǵy aptada merdigerler sý sorý jumysyn eki aýysymmen júrgizip jatyr. Olar Ahýaldyq ortalyqtyń 109 nómirine jáne sý tasqynyna qarsy shtabqa túsken ótinishti qabyldaıdy. Keıin qajetine qaraı assenızator jiberedi, qum tasymaldaıdy. Sonymen birge jınalǵan sýdy aǵyzyp jiberý úshin arnaıy tehnıka jiberedi.
— Qala boıynsha 150-ge jýyq assenızator tartyldy. Búgingi kúnge 104 458 tekshe metr erigen qar sýy soryldy. Sý kóp jınalatyn jerlerge motosorǵy qoıylyp jatyr. Assenızator júre almaıtyn ýchaskelerge sý aıdaý tehnıkasy jiberilýde. 80-nen astam aýyr tehnıka bar. Olar býldozer, kran, ekskavator, tıegishter, júk tasymaldaǵyshtar. Merdigerler 109 qyzmetinen ótinishterdi qabyldap alady. WhatsApp-ta ortaq chat ashylyp, operatorlar turǵyndardan túsken ótinishti jiberip otyr. Ótinimder táýlik boıy qabyldanady. Tehnıka barlyq mekenjaıǵa barady. Assenızator kólikterinde GPS trekıngi bar. Olardyń qaı jerde ekeni tekserilip otyrady. Sondyqtan olar óz ýchaskelerindegi jumysty aıaqtamaı ketpeıdi, — dep habarlady Aqtóbe qalasy ákiminiń baspasóz hatshysy Aıgúl Baımenova.
Talap boıynsha páter ıeleri kooperatıvi, múlik ıeleri birlestigi kóppáterli úılerdiń aýlasyndaǵy qardy jınap, sý aıdaýdy uıymdastyrýy kerek. Bıznes nysandarynyń ıelerine de osy talap qoıylǵan.
— Búgingi tańda qalanyń sý basý qaýpi bar aýdandarynan qar shyǵaryldy. Qazir birqatar kóshede qalǵan qar shyǵarylyp jatyr. Jalpy 655 myń tekshe metr qar shyǵaryldy. Qar ónerkásiptik aımaqta qurylǵan polıgonǵa tasylyp jatyr. Bul baǵyttaǵy jumystarǵa 420 samosval jáne júk tıegishter tartyldy. Negizgi kúsh qalanyń sý basý qaýpi bar Máskeý, Qurmysh, Sút zaýyty, Shanhaı aýdandaryna baǵyttaldy. Odan bólek, qalanyń ishindegi jáne turǵyn alaptardaǵy aryq júıelerin qardan tazartý, sýdyń baǵytyn burý jumystary júrdi. Qalada uzyndyǵy 55 shaqyrym bolatyn sýaǵar, kanal júıesi bar. Tazartýǵa eki aýdan boıynsha 7 merdiger uıym jumyldyryldy. ıAǵnı 230 jumysshy, áskerı bólimderdiń 400 sarbazy men áskerı ınstıtýttyń 140 kýrsanty tartyldy. Qum toltyrylǵan qaptar daıyndalyp, ózenderde muz jarý jumystary júrgizildi, — dedi Aıgúl Baımenova.
Aqtóbe qalasynda qaýipti aımaqty kóbine baý-baqsha ujymdary tur. Basym bóligi Almaty aýdanynda ornalasqan. Atap aıtqanda Aqshat, Qyzyljar, Qýraıly, Eset batyr turǵyn alaptary men Zelenstroı, Peschanka, Gıdrogeolog baý-baqsha ujymdarynda arnaıy tehnıka erigen qar sýynyń baǵytyn burý, sý arnalaryn tazalaý, ózen jaǵasynda ornalasqan úılerdiń aýmaǵyna bóget jasaý, jaǵalaýdy nyǵaıtý jumystaryn júrgizip jatyr.
— Astana aýdanyndaǵy sharýalarǵa T. Bıgeldınov atyndaǵy áýe qorǵanys kúshteri áskerı ınstıtýtynyń kýrsanttary men № 3020038 áskerı bóliminiń sarbazdary jumyldyryldy. Bul aýdanda uzyndyǵy 33 myń metr ashyq jáne jabyq sýaǵar bar. Sondaı-aq AZF-1,4,5, AZHS-4,5 jáne TETs-2 baý-baqsha ujymdarynda qar shyǵarý jumystary úzdiksiz júrgizildi. Jańaqonys, Qurashasaı, Sazdy turǵyn alaptary aýmaǵynda sýdyń baǵytyn burý jumystary jalǵasyp jatyr, — dedi Aqtóbe qalasy ákiminiń baspasóz hatshysy.
Eske salsaq, keshe Oıylda ýaqytsha ótkel buzyldy. Qazir adamdar qaıyqpen qatynas jatyr. Qaıyqpen tasymaldaý saǵat 8:00–19:00 aralyǵynda júrgiziledi.