Aqtóbe qalasynda eki jyl burynǵy sý tasqynynda jarııalanǵan tótenshe jaǵdaıdyń kúshi joıyldy
AQTÓBE. KAZINFORM - Jergilikti aýqymdaǵy tabıǵı sıpattaǵy tótenshe jaǵdaı 2024 jyly 29 naýryzda jarııalanǵan bolatyn. Arada eki jarym jyldan astam ýaqyt ótken soń ǵana jańa sheshim qabyldandy.
Qala ákimi Azamat Bekettiń sheshimi «QR Jergilikti memlekettik basqarý jáne ózin-ózi basqarý týraly» Zańynyń 37-babyna, QR «Quqyqtyq aktiler týraly» Zańynyń 27-babyna sáıkes shyǵaryldy. Sonymen birge Tabıǵı jáne tehnogendik sıpattaǵy tótenshe jaǵdaılardyń aldyn alý jáne olardy joıý jónindegi qalalyq komıssııanyń hattamasyna súıendi.
Bıyl qarashada «Jergilikti aýqymdaǵy tabıǵı sıpattaǵy tótenshe jaǵdaı jarııalaý týraly» sheshiminiń kúshi joıyldy.
Eske salsaq, 2024 jyly Aqtóbe oblysy boıynsha myńnan astam úı turýǵa jaramsyz bolyp qaldy. Onyń teń jartysy qaıta salynsa, turǵyndardyń teń jartysy úı satyp aldy.
Al Aqtóbe qalasynda qırap qalǵan 105 úıdi súrýge 130 mln, al 86 úıdi súrýge 120 mln teńgeden astam qarjy qarastyryldy. Byltyr 191 úıdi súrý jumysy júrgizildi.
Elimizde qalpyna keltirý jumysy tolyq aıaqtalǵannan keıin ǵana tótenshe jaǵdaı rejımi joıylady.