Aqtóbe qalasynda bıyl 470 ınternet alaıaqtyq deregi tirkeldi

AQTÓBE. KAZINFORM - Aqtóbe qalasynda 470 alaıaqtyq deregi tirkelse, kóbine áıelder san soǵyp qalǵan. Tergeý kezinde 61 qylmystyq is ashyldy.

Aqtóbe qalalyq PB tergeý bóliminiń bastyǵy Galına Styrlıchýk ınternet alaıaqtyǵy deregi azaıǵanyn habarlady. Degenmen qala boıynsha 470 qylmystyq quqyqbuzýshylyq tirkeldi. Qazirgi kezde 61 qylmystyq is ashyldy. 

- Internet alaıaqtaryna kóbine áıelder aldanady. Qalada 382 áıel jábirlenýshi tirkeldi. Onyń ishinde jumys istemeıtini, zeınetkeri de bar. Túrli taýar satý-satyp alý, kólik satý-satyp alý saıttarymen birge áleýmettik jelide de kóp aldanady. Adamdar satýshynyń kim ekenine mán bermeı-aq satyp alýǵa asyǵady, aqshasyn aýdara salady. Sodan keıin bizge kelip, aryz jazady. Jábirlenishi sol kúni-aq aryz jazýy tıis. Erte aıtsa, biz de tez anyqtaı alamyz. Keıde esepshot nómirin aıtyp, bankke habarlasyp, aqshany buǵattap qoıamyz,- dedi Galına Styrlıchýk.

Onyń aıtýynsha, qazir belgili bir mekeme basshysynyń nómirinen habarlama jazyp, UQK qyzmetkerleri habarlasatynyn, qajetti aqparatty der kezinde berý kerek ekenin aıtady. Sol kezde jábirlenýshi basshysyna habarlaspaıdy, kerisinshe ile-shala telefon shalǵan adamǵa qupııa málimetterdi beredi. 

- Alaıaqtar aqparat alǵan boıda nesıe rásimdep jiberedi. Keıbiri esepshotyndaǵy bar aqshasynan aıyrylady. Mundaı 13 derek tirkeldi,- dedi Aqtóbe qalalyq PB tergeý bóliminiń bastyǵy. 

Aıta keteıik, bıyl 4 qala turǵyny alaıaqtardan 3 mln teńge aqshasyn qaıtaryp aldy. 

Eske salsaq, byltyr óńirde myńnan astam ınternet alaıaqtyǵy deregi tirkeldi.