Aqtóbe qalasy men 8 aýdanda muz jarý jumystary bastaldy
AQTÓBE. KAZINFORM – Aqtóbe oblysynda bıyl tasqyn qaýpi joǵary. Tótenshe jaǵdaılar qyzmeti men ákimdik qala men aýdandarda muz jarý jumystaryn ótkizdi.
Aqtóbe oblysynda sý basý qaýpi bar 58 eldimeken bolsa, sol aýyldar ornalasqan aýdandardyń bárinde muz jarý jumystary júrgiziledi. Ásirese Aqtóbe qalasynda qaýip joǵary.
- Búgingi kúni Aqtóbe qalasynda muz keptelisiniń aldyn alý úshin Elek ózeninde muz jarý jumysy júrgizildi. Aýmaǵy 5 myń sharshy metrde muz jarylady. Dál osy jumys Aqtóbe qalasy men 8 aýdanda júredi. Qazgıdromettiń málimetine súıensek, Aqtóbe qalasy, Muǵaljar, Mártók, Qobda aýdandarynda qar bylǵyrǵymen salystyrǵanda 1,5-2 ese kóp. Sonymen birge jerdegi tońnyń qalyńdyǵy 120 sm qurap otyr. Osyǵan baılanysty TJD men jergilikti atqarýshy organdar birlesip, aldyn alý daıyndyqtaryna kiristi. 2600-den astam adam, 800-den astam tehnıka, 100-den astam júzý quraly bar. Aqtóbe oblysyna Qyzylorda men Mańǵystaýdan kúsh quraldary keledi,- dedi Aqtóbe oblystyq TJD bastyǵynyń orynbasary Aıbat Jańabergenov.
Aıta keteıik, qazirgi kezde Aqtóbe qalasynda aryqtardy tazartý jumystaryna áskerı bólim sarbazdary jumyldyryldy. Aqtóbe qalasynda 80 saıajaı ujymynda qaýip bar. Olar úshin 16 ýaqytsha ornalastyrý pýnkti daıyndalady.
Sonymen birge aýdan ákimdikteri qaıyq pen qum toltyrýǵa arnalǵan qap satyp alyp jatyr.
