Aqtóbe qalasy mańyndaǵy aýylda balabaqsha tárbıelenýshileri tońyp júr

AQTÓBE. KAZINFORM – Aqtóbe qalasy Bekqul baba aýylyndaǵy balabaqsha tárbıelenýshileriniń ata-analary shaǵym aıtyp, kómek surady. Balabaqsha ishi salqyn, balalar jıi aýyryp qalady.

Qala ortalyǵyna jaqyn mańdaǵy Bekqul baba aýylynyń turǵyndary búgin jınalyp, balabaqshaǵa bardy. Ata-analar kúz kelip, qys túsken kezde balalary jıi aýyratynyn aıtyp, shaǵym túsirdi. Qalyń kıimmen jiberedi, keıbiri ýaqytsha toqtatyp qoıdy.

- Aýylda bir ǵana balabaqsha bar. Ol jeke bolǵanymen, burynǵy mektep ǵımaratyn alǵan. Qazirgi túri apatty jaǵdaıda turǵan sııaqty. Sondyqtan biz osyny qarap, tekserip, sheshimin shyǵarǵanyn qalaımyz, - degen ata-analar Aqtóbe qalalyq bilim bóliminiń basshysyn shaqyrdy.

Bekqul baba aýylyndaǵy balabaqsha eski mekteptiń ǵımaratynda ornalasqan. Birneshe jyl buryn ony jeke kásipker satyp alyp, balabaqshaǵa aınaldyrdy. Qazirgi kezde 95 balaǵa memlekettik tapsyrys alyp otyr. Bıýdjetten aıyna ár balaǵa 54 600 teńge bólinedi.

- Ata-analar «ishi salqyn, balalar qaıta-qaıta aýyryp jatyr» dep shaǵym aıtty. Balabaqsha ishin qaradym. Jylý batareıalaryn ustap qaraǵanda yssy bolyp tur. Biraq ishki temperatýrasy durys emes. Keminde +23+24 °C bolýy kerek. Bul jerde odan tómen. Balalarǵa salqyn tııýi múmkin. Ata-analardyń aryz-shaǵymy negizinde qarap, ári qaraı «balabaqsha jumys isteı me, joq pa» degen másele sheshiledi. Toqtaýy da múmkin. Quryltaıshysy tıisti sheshim shyǵarmasa, bul úlken suraq bolady. Ókinishke qaraı munda ózge balabaqsha joq, - dedi Aqtóbe qalalyq bilim bóliminiń basshysy Latyp Álibı.

Eske salsaq, buǵan deıin Aqtóbe qalasy Eset batyr turǵyn alabynda kópqabatty úı turǵyndary jylytý maýsymy bastalǵaly beri jylý batareıalarynyń ysymaǵanyn aıtyp, shaǵymdandy.