Aqtóbe qalasy mańynda ózen boıyndaǵy qamys órtendi
AQTÓBE. KAZINFORM – Aqtóbe qalasy mańyndaǵy Sazdy ózeni boıynda qamys órtendi. Arada úsh saǵat ótkende órt oqshaýlandy.
Aqtóbe qalasynyń Sazdy ózeni mańynda bastalǵan órt baý-baqsha ujymynyń turǵyndaryn ábigerge saldy. Qazir munda órt sóndirýshiler men jergilikti atqarýshy organnyń mamandary, polıtsııa júr.
- Aqtóbe qalasy Astana aýdany Sazdy ózeni boıyndaǵy Lesnoe mańynda qamys janyp jatqany týraly aqparat kelip tústi. Oqıǵa ornyna TJD garnızonynan 37 adam, 10 tehnıka jumyldyryldy. Jergilikti atqarýshy organdardan 10 tehnıka men 7 adam bar. Qazirgi kezde órt sóndirý jumysy jalǵasyp jatyr, - dedi oblystyq TJD bastyǵynyń orynbasary Aıbat Jańabergenov.
Oblystyq TJD baspasóz qyzmetiniń habarlaýynsha, habarlama saǵat 13:28-de tústi. Saǵat 16:26-da órt aýmaǵy oqshaýlandy. Órt aýmaǵy – 5 gektar. Zardap shekken adam joq.
- Baý-baqsha ujymynyń kúzetshisi ortaq chatqa Lesnoe turǵyn alaby jaǵynan órt shyqqany týraly habarlady. Aldymen adamdar ózderi sóndirip jatty. Keıin órt sóndirýshiler keldi. Órt túste bastaldy, - dedi saıajaı turǵyny Lena Kravets.
Oblystyq PD baspasóz qyzmetiniń habarlaýynsha, oqıǵa ornyna 30 polıtsııa qyzmetkeri jiberilgen. Olar da qaýipsizdikti qamtamasyz etýge kómektesip jatyr.
Eske salsaq, 2024 jylǵy 6 qazanda Qaraǵandy oblysy Qarqaraly aýdanynyń Sharyqty jáne Qoıandy aýyldyq okrýgterindegi dala aımaǵynda bıiktigi 1 metrge deıin qurǵaq shóp jandy.
