Aqtóbe qalasy ákimi apparatynyń burynǵy basshysy qaıtadan sot aldynda jaýap beredi
AQTÓBE. KAZINFORM – Oǵan Qylmystyq kodekstiń «Alaıaqtyq» baby boıynsha aıyp taǵylyp, qalalyq jáne oblystyq sot aqtaý týraly úkim shyǵardy. Prokýratýra Kassatsııalyq sotqa shyǵym túsirdi. Іs qaıta qaralatyn boldy.
Aqtóbe qalasy ákiminiń apparat basshysy qyzmetin atqarǵan Nursultan Isembaıulyna Qylmystyq kodekstiń «Alaıaqtyq» baby boıynsha aıyp taǵyldy. №2 Aqtóbe qalalyq soty byltyr naýryzda aqtaý úkimin shyǵardy. Tipti N.Isembaıuly zańsyz jaýapqa tartylǵany úshin shyǵyndy óndirip alýǵa quqyly boldy. Sol jyly maýsym aıynda Aqtóbe oblystyq sotynyń qylmystyq ister jónindegi sot alqasy isti apellıatsııalyq satyda qarap, №2 Aqtóbe qalalyq sotynyń úkimin ózgerissiz qaldyrdy.
Іs materıalyna súıensek, Kassatsııalyq sotta QR Bas prokýrordyń orynbasary Áset Shyndalıev sot aktisiniń kúshin joıyp, qylmystyq isti sot talqylaýyna qaıta jiberýdi surady. Prokýror sot tergeýi tolyq júrgizilmedi jáne dálelder tolyq negizge alynbady dep sanaıdy. Al aqtalyp shyqqan Nursultan Isembaıuly shaǵymdy qaraýsyz qaldyrýdy surady. Kassatsııalyq sot prokýrordyń ótinishin qanaǵattandyrdy.
Aıta keteıik, Nursultan Isembaıuly Aqtóbe qalasy ákimi apparatynyń basshysy qyzmetin atqaryp júrgen kezde, ıaǵnı, 2022 jyly Saltanat Sabyrova jer almaq bolyp B.Oljagereevaǵa ótinish aıtady. Ekeýi de Aqtóbe qalalyq tıimdi damý ortalyǵynyń qyzmetkeri. Aıyptaý aktisindegi derekke súıensek, Nursultan Isembaıuly óz qyzmettik kabınetinde B.Orjagereevadan 3 mln teńge alǵan. Sóıtip S.Sabyrovaǵa jer ýchaskesin bólýge kelisim jasalǵan. Alǵashqy sotta N.Isembaıuly 2022 jyldyń 27 qyrkúıegi kúni jumys ornynda bolmaǵanyn, aıyptaý aktisi tek B.Oljagereeva men kýáger S.Sabyrovanyń sózine qurylǵanyn aıtty. Telefon nómiri men ondaǵy habarlamalar kóshirmesi dálel bola almaıtynyn aıtyp, aqtaldy. Kassatsııalyq sot qylmystyq istiń materıalyn qarap, sot otyrysynyń aýdıosyn tyńdap, prokýror shaǵymyn negizdi dep tanydy.
Іs Aqtóbe oblystyq sotynyń qylmystyq ister jónindegi sot alqasynda qaıta qaralady. Sot alqasynyń quramy alǵashqydan ózge bolady. Al Nursultan Isembaıuly eshqaıda ketpeý týraly qolhatpen bostandyqta júredi.
Eske salsaq, Aqtóbede alaıaqtyǵy úshin aıyptalyp jatqan depýtattar bas bostandyǵynan aıyrylýy múmkin. Jaryssózde prokýror eki depýtatty 6 jyl 8 aıǵa bas bostandyǵynan aıyrýdy surady. Sot úkimi erteń shyǵady.
