Aqtóbe qalasy ákimi apparatynyń burynǵy basshysy bas bostandyǵynan aıyryldy
AQTÓBE. KAZINFORM - Sottalýshy Nursultan Isembaıuly Qylmystyq kodekstiń «Alaıaqtyq» baby boıynsha aıypty dep tanylyp, 3 jylǵa bas bostandyǵynan aıyryldy. Sonymen birge azamattyq talap aryz ishinara qanaǵattandyryldy.
Aqtóbe oblystyq sotynyń sot alqasy buǵan deıin aqtalyp shyqqan sottalýshy Nursultan Isembaıulyn bas bostandyǵynan aıyrdy. Sottalýshy sot zalynan qamaýǵa alyndy.
- Nursultan Isembaıuly Qylmystyq kodekstiń 190-baby 3-bóligi 2-tarmaǵy boıynsha aıypty dep tanylyp, 3 jylǵa bas bostandyǵynan aıyrylsyn. Jazasyn qaýipsizdigi ortasha túzetý mekemesinde ótesin. Jábirlenýshiniń azamattyq talap aryzy ishinara qanaǵattandyrylyp, 3 mln teńge materıaldyq shyǵyn, zańdy ókilge 1,5 mln teńge óndirilsin, - dedi sýdıa.
Sonymen birge sottalýshy memlekettik qyzmet salasynda jumys isteý quqyǵynan ómir boıyna aıyryldy.
Eske salsaq, Nursultan Isembaıuly Aqtóbe qalasy ákimi apparatynyń basshysy qyzmetin atqaryp júrgen kezde, ıaǵnı 2022 jyly Saltanat Sabyrova jer almaq bolyp B.Oljagereevke ótinish aıtady. Ekeýi de Aqtóbe qalalyq tıimdi damý ortalyǵynyń qyzmetkeri. Aıyptaý aktisindegi derekke súıensek, Nursultan Isembaıuly óz qyzmettik kabınetinde B.Orjagereevten 3 mln teńge alǵan. Sóıtip S.Sabyrovaǵa jer ýchaskesin bólýge aýyzsha kelisim jasalǵan. Alǵashqy sotta N.Isembaıuly 2022 jyldyń 27 qyrkúıegi kúni jumys ornynda bolmaǵanyn, aıyptaý aktisi tek B.Oljagerev pen kýáger S.Sabyrovanyń sózine qurylǵanyn aıtty.
Sot úkimi kúshine engen joq. Taraptar Kassatsııalyq sotqa shyǵym túsire alady.
