Aqtóbe qalalyq sotynyń ǵımaraty ashyldy
AQTÓBE. QazAqparat - Aqtóbede qalalyq sot óz jumysyn bastady. Munda azamattar óz-ózine qyzmet kórsete alady, dep habarlaıdy QazAqparat tilshisi.
Aqtóbe qalasynyń Almaty aýdanynda jańa sot ashyldy. Sharaǵa Aqtóbe oblysynyń ákimi Berdibek Saparbaev, Joǵarǵy sot janyndaǵy sottardyń qyzmetin qamtamasyz etý departamenti basshysynyń orynbasary Qaırat Elibaev qatysty. Bir ereksheligi, munda óz-ózine qyzmet kórsetý aımaǵy men aqparat ortalyǵy qarastyrylyp, medıator, qorǵaýshy men notarıýs kabınetteri jumys isteıdi. Sot otyrysy ótetin alty zalda aýdıo-beıne jazba júıesi bar. Oblys ákimi Berdibek Saparbaev elektrondy sot isi men «smart sot» pılottyq jobasynyń jumysymen tanysty.
«Sapaly sot tóreligi úshin jaǵdaı jasaý - Elbasynyń mańyzdy basymdyqtarynyń biri. Bul ǵımaratta qyzmetkerler men kelýshilerge barlyq jaǵdaı bar. Basty mindet - sot tóreligin atqarý kezinde zańdylyqty, ashyqtyq pen aıqyndyqty qamtamasyz etip, azamattarmen jumys kezinde bıýrokratııa men áýre-sarsańdy barynsha boldyrmaý», - dedi oblys ákimi B.Saparbaev.
