Aqtóbe qalalyq bilim bóliminiń basshysy aýdıtke jalǵan aqparat bergeni úshin jazalandy
AQTÓBE. KAZINFORM – Aqtóbe qalalyq bilim bóliminiń basshysy Latyp Álibı alǵashynda esepshisin tekserý týraly ótinish jasap, keıin ol oıynan aınyp qaldy. Al tekserý júrgizgen aýdıtorlar esepshiniń ózine artyq syıaqy aýdaryp alǵanyn anyqtady.
Aqtóbe oblysy boıynsha ishki memlekettik aýdıt departamenti basshysynyń orynbasary Qııat Jumabaevtiń habarlaýynsha, 2021-2024 jyldar aralyǵyna tekserý júrgizildi. Nátıjesinde esepshi ózine 3 mln 585 myń teńge syıaqyny, 136 myń teńge eńbekke ýaqytsha qabiletsizdigi boıynsha áleýmettik járdemaqyny artyq aýdarǵany anyqtaldy. Sonymen birge Aqtóbe qalalyq bilim bóliminiń basshysy Latyp Álibı aýdıtorlarǵa aldyn ala ózge, tekserý kezinde ózge qujat bergeni anyqtaldy.
- Aýdıt barysynda syıaqy berý týraly buıryqtardyń qosymshalary bir-birine sáıkes kelmeıtin eki nusqada usynyldy. Barlyǵy 14, 5 mln teńgege rásimdik buzýshylyqtar anyqtaldy. Aýdıtke jalǵan aqparat usynǵany úshin mekeme basshysy Ákimshilik quqyq buzýshylyq týraly Kodeksiniń 462 baby 1 tarmaǵyna sáıkes ákimshilik jaýapqa tartyldy. Aýdıt barysynda mekemeniń esepshisi 3,7 mln teńgeni bıýdjetke qaıtardy,- dep habarlady Aqtóbe oblysy boıynsha ishki memlekettik aýdıt departamenti basshysynyń orynbasary Qııat Jumabaev.
Sot kabınetindegi is materıalyna súıensek, Álibı Latyp aýdıtorlyq tekseris óziniń bergen shaǵymy negizinde ótkizilgenin, sonyń barysynda usynylǵan qujattar eki nusqada berilgenin, ony qadaǵalamaǵanyn moıyndaǵan. Sot qaýlysymen Álibı Latypqa 258 440 teńge aıyppul salynyp, óndirildi.
Aqtóbe oblysy boıynsha ishki memlekettik aýdıt departamentiniń basshysy Sáken Qasymovtyń aıtýynsha, bólim basshysy ETsQ ózgege berýge bolmaıtynyn bile tura qatelik jibergen.
- Bilim salasyndaǵy buzýshylyqtar ETsQ esepshige bergennen bolyp jatyr. Bul týraly semınar ótti, oǵan Aqtóbe qalalyq bilim bóliminiń basshysy Álibı Latyp ta qatysty. Bile tura solaı jasap tur,- dedi Sáken Qasymov.
Eske salsaq, Aqtóbe qalasyndaǵy №55 orta mektep-gımnazııasynyń dırektory sottaldy. Ol esepshige elektrondy tsıfrlyq qoltańbasyn berip, muǵalimderge artyq jalaqy aýdaryp otyrǵan. Sot dırektordy 3 jylǵa bas bostandyǵynan aıyrdy.