Aqtóbe irgesindegi aýyl turǵyndary ákimdikten kómek surady
AQTÓBE. QazAqparat – Aqtóbe qalasynyń irgesindegi Qyzǵaldaqty aýylynyń turǵyndary halyqaralyq tasjolǵa júrginshiler jolaǵyn salyp berýdi surady, dep habarlaıdy QazAqparat tilshisi.
Qyzǵaldaqty aýylynda 50 úı bar. Bul aýyldyń balalaryn mektep avtobýsy tasıdy, al turǵyndar Qýraıly aýylynyń avtobýsyna miný úshin jolǵa shyǵyp, belgilenbegen jerde turýǵa májbúr.
«Aýylda 13 jyldan beri turamyn, jasym – 80-de. Nemerelerimdi daıyndyq sabaqtaryna shyǵaryp salý úshin halyqaralyq tas joldaǵy qorshaýdy sekirip ótýge týra keledi. Aıaldamalary da joq. Sekirýge de kúsh kerek», - dedi aýyl turǵyny Maǵrýpa Haırýllına.
Bul jerde birneshe adam kólik astyna túsip, mert bolǵan. Kesh qaraıa joǵary jyldamdyqpen kele jatqan kólik júrgizýshisi adamdardy kórmeı qalyp jatatyn oqıǵalar jıi bolady.
«Aýylda 25 jyldan beri turamyn. Nemerelerimizdi sabaqqa tasyp júrý qıyndap ketti. Alty aı buryn týysymyz úılenip edi. Kelinshegi osy jolǵa shyǵamyn dep kólik astyna túsip, mert boldy. Jezdem, kúıeý balam da osy jolda kóz jumdy. Qarańǵy kezde qatty kele jatqan kólik kórmeı qalady. Aıaldama da joq. Aıaǵymyz aýyrǵanda temir qorshaýdyń astynan eńbekten ótemiz», - Myrzagúl Eltezerova.
Jol men qoǵamdyq kólikke qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi jaýapty. Mamandar máseleni bilgenimen, aqsha joq dep otyr.
«Turǵyndar ákimdikke aryz túsirdi. Hat qalalyq jolaýshylar kóligi jáne avtomobıl joldary bólimine joldandy. Qarjy máselesine baılanysty aıaldama, jaıaý júrginshiler jolyn salý máselesi sheshilmeı tur. Aldymen jobalyq-smetalyq qujat jasalýy tıis», - dedi Aqtóbe qalasy Astana aýdany ákiminiń orynbasary Almas Jaqsylyqov.
