«Aktobe Invest - 2017»: Aqtóbede munaı jabdyqtaryn shyǵaratyn zaýyt jumysy tanystyryldy
AQTÓBE. QazAqparat - Aqtóbede munaı jabdyqtaryn shyǵaratyn zaýyt Qytaı men Reseıden tasymaldanǵan qubyrlardy synaqtan ókizip, óndiriske daıyndap beredi. «Aktobe Invest - 2017» forýmyna qatysýshylar zaýyttyń aldaǵy josparlarymen tanysty, dep habarlaıdy QazAqparat tilshisi.
Aqtóbede «Aktobe Invest - 2017» forýmy ótip jatyr. Forýmǵa álemniń 20 elinen 400-ge jýyq adam qatysady. Halyqarylyq qarjy uıymdary men ınstıtýttar, otandyq jáne sheteldik kásipkerlerdiń, ınvestorlardyń basyn qosqan forým kezinde 11 memorandýmǵa qol qoıylady degen jospar bar.
Búgin forým qatysýshylary Aqtóbedegi óndiris oryndarynyń jumysymen tanysty. Olardyń arasynda kóktemde iske qosylǵan Qazaqstandaǵy munaı jabdyqtary zaýyty bar. Munda dıametri ártúrli qubyrlar tazartylyp, synamadan ótkizilip, dánekerlenip, óndiriske daıyndalady. Bul munaı óndirý kólemin arttyrýǵa múmkindik beretin qubyrlar. Shıkizat Qytaı men Reseıden tasymaldanyp jatyr.
«Zaýyttaǵy qural-jabdyqtyń bári Qytaıdan ákelindi. Qazirgi ýaqytta 2400 tonna qubyr shyǵaryldy. Bıyl 5 myń tonna ónim shyǵarý jospary bar. Teń jartysy oryndaldy. Óndiris sáýir aıynda ǵana iske qosylǵan bolatyn. Aldaǵy ýaqytta qýattylyǵy artady. Jalpy jylyna 10-20 myń tonna qubyr shyǵarýǵa múmkindik bar. Qubyrlar Qyzylorda, Aqtaý, Atyraý oblystaryna jóneltilip jatyr. Ázirge Aqtóbedegi munaı óndirý zaýyttarynan tapsyrys túspedi. Satyp alýshylary qubyrdyń sapasy men baǵasyna rıza. Aqtóbede básekelestik joǵary. Degenmen bizde shyǵarylatyn keıbir ónimderimizde aıyrmashylyq bar», - dedi Qazaqstandaǵy munaı jabdyqtary zaýyty dırektorynyń orynbasary Danııar Lekerov.
Munaı jabdyqtaryn shyǵaratyn keshende janar-jaǵarmaı, gazǵa qajetti tsısternalar jasalady. Sonymen qatar, vahtalyq aýyldarǵa arnalǵan zamanaýı vagondar daıyndalady.
«Vagon kólemi men dızaınyn tapsyrys berýshiler aıtady. Jobalyq-smetalyq qujaty daıyn bolǵan soń kelisimmen vagon daıyndalady. Qazir burǵylaý kompanııasy tapsyrys berdi. Sonymen qatar, bizde qalyńdyǵy 8-10 sm bolatyn temirdi qııatyn, tesetin qural bar. Janar jaǵarmaı saqtaıtyn tsısternalarǵa qajetti shıkizattyń basym bóligi jergilikti jerde bar. Al keıbir jabdyqtary Qytaıdan ákelinedi. Bul tsısternada jańbyr men aıazǵa tózimdiligi joǵary arnaıy qurylǵy bar. Óndiristegi jabdyqtyń bári Qytaıdan tasymaldanǵan soń, biz jergilikti jumysshylardy oqytýǵa kiristik. Aldaǵy ýaqytta tek qazaqstandyq jumysshylar eńbek etetin bolady», - dedi Danııar Lekerov.
Aqtóbege kelgen ınvestorlar men kásipkerler munaı óndirisine qajetti qurylǵy men jabdyqtar shyǵaratyn zaýyttyń jumysyn joǵary baǵalady.
«Qalamqas pen Jetibaı ken ornyn ıgerip otyrǵan kompanııa úshin Aqtóbedegi óndiris ornynda shyǵarylatyn jabdyq qajet. Forým aıasynda jańa zaýyttyń jumysymen tanysyp otyrmyz. Bul bizge óndiristegi qazaqstandyq úlesti arttyrýǵa septegin tıgizedi. Sebebi, biz bul jabdyqtardy Reseıden alyp otyrmyz», - «Mańǵystaýmunaıgaz» AQ bas dırektory ákimshilik máseleler jónindegi orynbasarynyń mindetin atqarýshy Nurlan Ilmuhambetov.
Aıta keteıik, Aqtóbedegi ınvestıtsııalyq forýmnyń negizgi jumysy erteń bastalady. Forým kezinde Aqtóbe óńiriniń ınvestıtsııalyq múmkindikteri túsindirilip, óńirde atqarylyp jatqan irgeli jumystar kórsetiledi.
