Aqtóbe ındýstrııalyq-ınnovatsııalyq aglomeratsııa ortalyǵyna aınalady

AQTÓBE. QazAqparat - Aqtóbe qalasy údemeli ındýstrııalyq-ınnovatsııalyq damý memlekettik baǵdarlamasynyń ekinshi besjyldyǵynyń negizderin qalyptastyrý sheńberinde Memleket basshysynyń mindetterin júzege asyrý úshin qajetti múmkindikterdiń joǵary áleýetine ıe. Bul týraly búgin Aqtóbe aglomeratsııasyn damytý máseleleri jóninde ótken májiliste Premer-mınıstr Serik Ahmetov aıtyp ótti.

Úkimet basshysynyń aıtýynsha, Aqtóbe - Qazaqstan qalalarynyń ishindegi jedel qarqynmen damyp kele jatqan qalalardyń biri, Memleket basshysy bul óńirdi Joldaýynda Astana, Almaty jáne Shymkent qalalarynan keıingi aglomeratsııalyq ortalyqtardyń biri retinde atap ótken.

- Aqtóbe aglomeratsııasyn ónerkásipti, onyń ishinde metallýrgııa, hımııa ónerkásibi, qurylys materıaldary, logıstıkany artyqshylyqpen damyta otyryp, ındýstrıaldyq-ınnovatsııalyq ortalyq retinde damytý kózdelip otyr. Aqtóbede birqatar ónerkásipter shoǵyrlanǵan, bul jerde munaı, gaz óndiriledi, agroónerkásiptik keshen damyp keledi. Al, eń bastysy, 100-300 shaqyrym radıýsta aýqymdy naryqtar bar, - dedi S. Ahmetov.

Oblystyń ónerkásiptik óndiristerin aralaǵan Úkimet basshysy kórgenderine kóńili tolǵanyn bildirdi.

- Óńirde ónerkásiptik kásiporyndar iske qosylýda, AÓK, qurylys salasy damýda. Munyń bári birinshi kezekte Memleket basshysynyń eń basty tapsyrmasy - halyqty jumyspen qamtý máselelerin sheshedi. Ekonomıkany ártaraptandyrý, qurylymdyq ózgerister, ónerkásipti damytý aıasynda eń mańyzdy máselelerdiń biri - qazaqstandyqtardy jumyspen qamtý, ıaǵnı jańa joǵary bilikti jumys oryndaryn qurý. Halyqtyń áleýmettik ál-aýqatynyń jaqsarýy osydan bastalady, - dedi ol.