«Aqtóbe» ındýstrııalyq aımaǵynda 2 óndiristik nysan men kóliktik-logıstıkalyq ortalyqtyń irgetasy qalandy
Jobalar Memleket basshysynyń «Qazaqstannyń úshinshi jańǵyrýy: jahandyq básekege qabilettilik» atty joldaýynda aıtylǵan ekonomıkany jedeldetilgen tehnologııamen jańǵyrtý boıynsha tapsyrmasyn oryndaý aıasynda júzege asyrylýda, dep habarlaıdy oblys ákiminiń baspasóz qyzmeti.
Tıimdi ekonomıkalyq-geografııalyq jaǵdaıdyń «Aqtóbe» ındýstrııalyq aımaǵyn «A» synypty kóliktik-logıstıkalyq ortalyqtyń qurylys orny etip tańdaýdaǵy aıqyndaýshy faktory bolǵanyn moıyndaǵan «Faeton kompanııasy» JShS jobany júzege asyrýǵa 2,5 mlrd teńge bólýge nıetti. Investorlar sondaı-aq, munda barlyq qajetti ınjenerlik-kommýnıkatsııalyq ınfraqurylymdardyń, avtokólik pen temirjol kólikterine arnalǵan kirme joldardyń baryn, energetıkalyq resýrstardyń salystyrmaly tómen baǵasy men ózderine usynylǵan ózge de jeńildikterdi joǵary baǵalaýda.
- Munyń bári biz úshin úlken qoldaý. Memleket basshysyna, oblys ákimdigine bıznesti damytýǵa kómektesken jobalary úshin alǵysymyz zor,-dedi «Faeton kompanııasy» JShS ókili Amangeldi Ahmetjanov.
Jańa kóliktik-logıstıkalyq ortalyqtaǵy qattaý júıesi SAP halyqaralyq standartyna sáıkes kelip, al júkóńdeý tehnologııasy avtomattandyrý men mehanıkalandyrýdyń joǵary deńgeıine ıe bolady. 2019 jyly qoldanysqa beriletin ortalyqqa 120 adam ornalastyrylady.
Aıta keteıik, atalmysh jobany júzege asyrý týraly kelisimge 2016 jyldyń kúzinde Aqtóbe jáne Almaty oblystary arasyndaǵy óńiraralyq kooperatsııany jolǵa qoıý aıasynda kelgen bolatyn.
Sondaı-aq, «Baýmaster Interneshnl» JShS-niń sýdespersııalyq boıaý men dekoratıvti sylaq óndirý tsehynyń qurylysy bastaldy. Bolgarlyq iri ınvestordyń qatysýymen júzege asyrylyp jatqan joba ımportty almastyrý strategııasyna saı. Óıtkeni Qazaqstan naryǵynda usynylǵan lak jáne boıaý ónimderiniń 80 paıyzy syrttan ákelingen. Birinshi kezeńde tsehtyń jyldyq qýattylyǵy jylyna 5 myń tonnaǵa deıin sýdespersııalyq boıaýdy quraıdy. Óndiris pen shyǵarylatyn ónimder tizimin arttyrý josparda bar.
Batys Qazaqstan úshin taǵy bir biregeı joba - «Gıgant» JShS-niń júk kólikteriniń qurastyrylymyn qaıta qalpyna keltirý jáne jańartý zaýyty. Eýropada osyǵan uqsas eki zaýyty bar nemis ınvestory jobany júzege asyrý úshin 800 mln teńge salatyn bolady. Kásiporyn jumysyn osy jyldyń jeltoqsan aıynda bastap, kem degende 20 jumys ornyn qamtamasyz etedi dep kútilýde.
Aıta keteıik, bir jyl buryn oblys ákimi ındýstrııalyq aımaqta 5 iri ınvestıtsııalyq jobanyń irgetasyn qalaǵan bolatyn. «TALANTechnology» JShS jáne «AktobeTOPSAPlast» JShS dep atalatyn eki zaýyt óndiristik protseske kirisip ketti. Úsh joba aıaqtalýǵa jaqyn, sonyń ishinde 2017 jyldyń jeltoqsan aıynda 180 adamdy jumyspen qamtıtyn «Zerde Keramıka Aqtóbe» JShS zaýyty iske qosylady dep kútilýde. Quny 6 mlrd teńge bolatyn óndiriste keramıkalyq granıt pen keramıkalyq taqtasha shyǵarylmaq. Kásiporynnyń qýattylyǵy - jylyna 5 mln sharshy metr ónim. Zaýyttyń ereksheligi - tapsyrys berýshige buıymnyń túsi men dızaınyn tańdaýǵa múmkindik beriledi. Sodan bolar qazirdiń ózinde kásiporynnyń josparlanǵan ónimdi shyǵarý úshin tapsyrystary bar.
- Memleket basshysy ındýstrııalyq aımaqtardy damytýǵa basa nazar aýdarady, sondyqtan, bul - ekonomıkany damytyp, ınvestıtsııa tartýdyń birden bir kózi. Biz 2016 jyldan bastap «Aqtóbe» ındýstrııalyq aımaǵyndaǵy jumysty jandandyrdyq. Jyl sońyna qaraı Qazaqstandaǵy iri óndiris oryndarynyń birine aınalatyn keramıkalyq granıt pen keramıkalyq taqtasha shyǵarý zaýytynyń birinshi kezegi iske qosylatyn bolady. Negizi búgin qalanǵan úsh joba da óńirimiz úshin jáne jalpy Qazaqstan ekonomıkasy úshin ózekti bolyp tabylady. Biz óz tarapymyzdan ınvestorlarǵa árqashan kómektesip, qoldaý kórsetip kelemiz jáne ári qaraı da kórsetetin bolamyz,-dep atap ótti oblys ákimi.
«Aqtóbe» ındýstrııalyq aımaǵynda quny 72 mlrd teńge bolatyn barlyǵy 12 joba júzege asyrylýda. Olar iske qosylysymen 1700 jańa jumys oryndary qurylmaq. Indýstrııalyq aımaqtyń jarty aýmaǵy ınvestorlarmen tolyqty, barlyq qajetti ınfraqurylymy bar bos turǵan jer telimderi 2018 jylǵa deıin óndiriske tolady dep boljanýda.
