Aqtóbe hrom qosyndylary zaýytyndaǵy bes jumysshynyń ólimine qatysty sot úkimi shyqty
AQTÓBE. QazAqparat – Aqtóbede zaýyttaǵy bes jumysshynyń ólimine qatysty aıyptalǵan úsh sottalýshy sot zalynan aqtalyp shyqty, dep habarlaıdy QazAqparat tilshisi.
Aqtóbe hrom qosyndylary zaýytynda jumysshylar syıymdylyǵy 50 tekshe metr bolatyn bakti tazartqan. Keıin bireýi aqaýdy kórip, ishine kirdi. Shyqpaǵan soń taǵy úsheýi túsken. Tórteýi oqıǵa ornynda kóz jumdy. Eki adam jedel járdem aýrýhanasyna jetkizildi. Atalǵan fakti boıynsha oblystyq polıtsııa departamenti Qylmystyq kodekstiń «Abaısyzda eki jáne odan da kóp adamnyń ólimine ákep soqqan qaýipsizdik tehnıkasyn buzý» baby boıynsha tergeý júrgizip, is qozǵaldy .
Búgin osy iske qastysty sot úkimi shyqty.
«№2 Aqtóbe qalalyq soty sottalýshy Rýstam Baltaǵojın, Turar Bısembın, Ótesin Muhanovqa qatysty Qylmystyq kodekstiń «Eńbekti qorǵaý qaǵıdalaryn buzý» baby boıynsha is qaraldy. Tseh bastyǵy Rýstam Baltaǵojın, aýysym sheberi Turar Bısembın jáne sheber Ótesin Muhanovqa bes jumysshynyń ólimine qatysty aıyp taǵyldy. Sottalýshylar ózderin aqtaýdy surady. Jábirlenýshiler sottalýshylardy bas bostandyǵynan aıyrmaýdy, jaza taǵaıyndaýdy sotqa qaldyrǵanyn aıtty. Prokýror 3 jylǵa bas bostandyǵynan aıyrýdy surady. Qylmys quramy bolmaǵan soń sot úkimimen sottalýshylar aqtaldy. Olar zańsyz qylmystyq jaýapqa tartylǵany úshin sot shyǵynyn óteı alady», - dep habarlady №2 Aqtóbe qalalyq sotynyń baspasóz qyzmeti.
Sot úkimi kúshine engen joq.
