Aqtóbe halyqaralyq áýejaıynyń janynan 858 gektar jer arnaıy ekonomıkalyq aımaqqa beriledi

ASTANA. KAZINFORM – Ónerkásip jáne qurylys mınıstrligi Aqtóbe arnaıy ekonomıkalyq aımaǵyn qurý týraly Úkimet qaýlysynyń jobasyn jarııalady.

Qaýlynyń erejesinde «Aqtóbe» arnaıy ekonomıkalyq aımaǵy Aqtóbe oblysy Aqtóbe qalasynyń ońtústiginde, «Ońtústik aınalma» tas jolynyń boıynda, Á.Moldaǵulova atyndaǵy Aqtóbe halyqaralyq áýejaı janynda ornalasatyny aıtylǵan.

«AEA aýmaǵy Qazaqstan Respýblıkasynyń aýmaǵynyń ajyramas bóligi bolyp tabylady jáne 858 gektar jerdi quraıdy», - delingen qujatta.

Arnaıy ekonomıkalyq aımaqtyń aldyna 2025 jyly óńirge 500 mln teńge ınvestıtsııa tartý týraly mindet qoıylyp otyr. Al 2040 jyldan bastap 2049 jylǵa deıin jyl saıyn 170,7 mlrd teńge ınvestıtsııa tartyp otyrýy kerek.

Osyǵan deıin elimizdegi áýejaılarda arnaıy ekonomıkalyq aımaq engizilýi múmkin ekeni týraly habarladyq.