«Aqtóbe» fýtbol komandasy jańa oıynshylarmen tolyǵýy múmkin
AQTÓBE. QazAqparat - «Aqtóbe» fýtbol klýby týrnır kestesiniń sońynda tur. Qazaqstan chempıonatyndaǵy 12 týrdan keıin bar bolǵany 6 gol soqqan oıynshylarǵa senim az. Sondyqtan klýb basshylyǵy 13 shilde kúni ashylatyn kezekti transferdi kútip otyr, dep habarlaıdy QazAqparat tilshisi.
Búgin «Aqtóbe» klýbynyń bas dırektory Maqsat Tıýmalıev alǵashqy aınalymdy qorytyndylap, atqarǵan jumysyn tizbektep berdi.
«Jańa maýsymǵa oıynshylardy jınaǵan kezde jergilikti fýtbolshylardy klýbqa qaıtarý mindeti júkteldi. Klýbqa Anton Shýrygın men Abylaıhan Totaı qosyldy. Biz eki aptada komanda jasaqtap, kóptegen qıyndyqqa tap boldyq. Oıynshylardyń kóbi kelisim shart jasap qoıǵan. Tipti legıonerler arasynda tańdaý jasap, olardy klýbqa shaqyrý qıynǵa soqty. Endi 12 maýsym kúni ashylatyn kezekti transferdi kútip otyrmyz. Al bas bapkerdi tańdaǵan kezde oıynshylar men bapker arasynda tildik kedergi bolmaıtyndaı etý qajet. Sebebi, klýb nátıjeni jaqsartýy kerek. Al bizde kútip otyratyn ýaqyt joq», - dedi «Aqtóbe» FK bas dırektory Maqsat Tıýmalıev.
«Aqtóbe» fýtbol komandasynyń kórsetkishi kúrt tómendegenimen, jankúıerlerdiń senimi joǵary. Ótken jyly 10 týrda 3 myńnan astam bılet satylsa, bıyl 5 myńnan astam bılet ótipti. Al klýb kartasyn 2800 adam alǵan. Ótken jyly kartany bar bolǵany 50 adam qoldanǵan. Sonymen qatar, jyl basynan beri klýb 3 mıllıon teńgeden astam tabys túsirdi.
«Aqtóbe» fýtbol klýby jańa oıynshylarmen tolyǵyp, nátıjesi tómen fýtbolshylarmen qoshtasady. Bizge kóshbasshylar kerek. Al bas bapkerdiń kim bolatyny aldaǵy kúnderi anyqtalady. Qazir kelissózder júrip jatyr»,- dedi M.Tıýmalıev.
