«Aqtóbe» fýtbol klýbynyń jańa quramy belgili boldy
AQTÓBE. QazAqparat – Búgin Aqtóbe oblysynyń ákimi Ońdasyn Orazalın «Aqtóbe» fýtbol komandasynyń jańa quramymen tanysty, dep habarlaıdy QazAqparat tilshisi oblys ákiminiń baspasóz qyzmetine silteme jasap.
Kezdesýge oblystyq dene shynyqtyrý jáne sport basqarmasynyń basshysy Evgenıı Goncharov, «Aqtóbe» FK basqarma tóraǵasy Artýr Smaǵulov, bas jattyqtyrýshy Alekseı Petrýshın qatysty.
«Jergilikti fýtboldy damytýǵa qarjylaı qoldaý bildirgen depýtattarǵa alǵys bildiremiz. Jańa quram aqtóbelik jankúıerlerdiń úmitin aqtaıdy dep senemin. Aldaǵy ýaqytta oıyndaryńyz jeńisti ári jemisti bolsyn dep tileımin», — dep atap ótti oblys ákimi Ońdasyn Orazalın.
Artýr Smaǵulov jańa qurammen tanystyrdy. «Aqtóbe» komandasynyń namysyn jergilikti oıynshylardan ózge, Reseıden kelgen Artýr Shabıkeev, Edýard Sýhanov, Oleg Chernyshev , Georgıı Býrnash, Alekseı Kontsedalov, Andreı Chasovskıhter qorǵaıtyn bolady. Serbııa elinen legıoner Nıkola Tsýtskıch, Kot-d’Ivýár respýblıkasynan Kýadja Kýassı, Chernogorııadan Djordjevıch Boban keldi. Komanda kapıtany Vıtalıı Volkov qoldaýy úshin oblys ákimine jáne klýb basshylyǵyna alǵys bildirdi.
«Klýbtyń namysyn qoldan bermeý úshin barymyzdy salamyz jáne bizge artylǵan senimdi aqtaımyz», - dedi Vıtalıı Volkov.
