«Aqtóbe» fýtbol klýbynyń oıynshylary múgedek balalarmen joldastyq kezdesý ótkizdi
AQTÓBE. QazAqparat - Búgin aýdandardaǵy fýtbol klýbynyń tárbıelenýshileri men múmkindigi shekteýli balalar úshin erekshe kún. Olar «Aqtóbe» fýtbol klýbymen joldastyq kezdesý ótkizip, jeńiske jetti, dep habarlaıdy QazAqparat tilshisi.
Aqtóbedegi Qobylandy batyr atyndaǵy ortalyq stadıon búgin ár kórermeni men jankúıerin tegin qabyldady. «Aqtóbe» fýtbol klýbynyń oıynshylary qaıyrymdylyq sharasyn ótkizip, aýdandardaǵy fýtbol ortalyǵynyń oıynshylarymen, damýy tejelgen balalarmen, balalar úıiniń tárbıelenýshilerimen joldastyq kezdesý ótkizdi.
«Fýtboldy bala kezimnen oınaımyn. Armanymnyń biri «Aqtóbe» fýtbol klýbymen oınap, sheberligimizdi synaý edi. Búgin sol armanymyz oryndaldy. Eki aı boıy daıyndalyp, bar kúshimizben oınadyq. Al buǵan deıin biz «Aqtóbeniń» oıyndaryna qatysyp, jankúıer bolyp, qoldaýǵa keletin edik»,- dedi Jaısań arnaıy kolledjiniń stýdenti Arman Batyrbek.
«Aqtóbe» fýtbol klýbyna bıyl 50 jyl tolady. Jastardy tárbıeleý, balalardy sportqa baýlýǵa arnalǵan joldastyq kezdesý elimiz boıynsha alǵash ret Aqtóbede uıymdastyrylyp otyr. Kásibı fýtbolshylar bir mezette 50 balaǵa qarsy oınap, olardyń alańda erkin qımyldaýyna jaǵdaı jasap berdi.
«Balalarmen oınaý óte qyzyqty boldy. Olar bizge qonaqqa kelip, kezdesý ótkenine qýandy, al biz sońymyzdan ergen balalardyń fýtbolǵa qyzyǵatynyn, el namysyn qorǵaıtyn jastardyń tárbıelenip jatqanyn kórdik. Balalar merekesi kúni olarǵa osyndaı qýanysh syılaǵanymyz úshin biz de erekshe yqylasqa bólendik»,- dedi «Aqtóbe» FK oıynshysy Samat Otarbaev.
Búgin kásibı fýtbolshylarǵa qarsy joldastyq kezdesýge Jaısań balalar úıiniń tárbıelenýshileri, №7 arnaýly túzetý mektebiniń oqýshylary men estý qabileti nashar balalar qatysty. Keıin balǵyndar ózderiniń súıikti oıynshylarymen sýretke tústi.
«Men №7 arnaıy mektepte oqımyn. Búgin men alańda shabýylshy boldym. Oıyn óte qyzyqty ótti. Stadıon úlken eken. Jankúıerler balalarǵa úlken qoldaý kórsetti. Qýanyshtymyz»,- dedi jas fýtbolshy Álıhan Álken.
Salaýatty ómir saltyna shaqyryp, tárbıe beretin kezdesý kezinde balalar jeńiske jetti. Esep: 3:2. Osylaısha «Aqtóbe» komandasynyń fýtbolshylary kishkentaı jankúıerlerine umytylmas syı jasady.
