«Aqtóbe» fýtbol klýbynyń qarjysyn talan-tarajǵa salǵandardyń isi sotta qaraldy
AQTÓBE. QazAqparat -«Aqtóbe» fýtbol klýbynyń burynǵy bas dırektory Dmıtrıı Vasılev pen oblystyq dene shynyqtyrý jáne sport basqarmasynyń basshysy qyzmetin atqarǵan Eskendirbek Mahanov búgin sot zalynda kezdesti.
Ekeýi de «Senip tapsyrylǵan bóten múlikti ıemdenip alý nemese talan-tarajǵa salý» baby boıynsha aıyptalyp jatyr, dep habarlaıdy QazAqparat tilshisi.
«Aqtóbe» fýtbol klýbynyń burynǵy bas dırektory Dmıtrıı Vasılev aldyn ala sot tyńdaýynda óziniń bıýdjet qarjysyn únemdegenin alǵa tartty.
«2015 jyly «Aqtóbe» fýtbol klýby 4 mıllıard teńge jumsaǵan. Al men bir jylda shyǵyn kólemin eki ese azaıtyp, bólingen 2 mıllıard teńgeni bárine jetkizdim. Bıýdjetten 1,7 mıllıard teńge tústi. Onyń 400 mıllıon teńgesi qaryzdy jabýǵa berildi. Bar jumsaǵanym, 1,3 mıllıard teńge. Al 2015 jyly fýtbolshylarǵa 3 mıllıard teńgeden astam jalaqy tólengen. Bul úlken qarjy»,- dedi Dmıtrıı Vasılev. Onyń ózi jemqorlardyń jolyn kesip, durys jumys istegenin aıtyp otyr.
Aıta keteıik, «Aqtóbe» fýtbol klýbyna bólingen qarjyny talan-tarajǵa saldy dep aıyptalyp jatqan oblystyq dene shynyqtyrý jáne sport basqarmasy basshysynyń qyzmetin atqarǵan Eskendirbek Mahanov Qylmystyq kodekstiń «Bılikti nemese laýazymdyq ókiletin asyra paıdalaný» baby boıynsha da sot aldynda jaýap beredi. Aldyn ala tyńdaý kezinde Vasılev burynǵy jattyqtyrýshy ıÝrıı Ýtkýlbaevty kýáger retinde sotqa qatystyrý týraly ótinish aıtty. Al Mahanov ýaqytsha ustaý oqshaýlaǵyshynan úıqamaqqa aýystyrýdy surady. Ol kepilge baspanasy men kóligin qoıýǵa daıyn. №2 Aqtóbe qalalyq sotynyń sýdıasy Gúlnar Tilepova úıqamaqtan bosatýdy suraǵan Vasılev pen úıqamaqqa alýdy suraǵan Mahanovtyń ótinishin qabyldaǵan joq.
Basty sot otyrysy 3 sáýirge belgilendi.
