«Aqtóbe» fýtbol klýbynyń bas bapkeri men bas menedjeri jumystan ketti
AQTÓBE. QazAqparat - «Aqtóbe» FK bas menedjeri Goran Velkovıch pen bas bapker Vladımır Mamınov jumystan bosatyldy, dep habarlaıdy QazAqparat tilshisi klýbtyń baspasóz qyzmetine silteme jasap.
«Aqtóbe» FK basqarma tóraǵasy Artýr Smaǵulov komandanyń shetelde ótken alǵashqy oqý-jattyǵý jumysynan soń serb mamanymen kelisimshart jasaýdan bas tartty.
«Maýsymnyń resmı ashylýyna bir aı ýaqyt qaldy, al komanda áli jasaqtalmaı jatyr. Selektsııa jumysy óte nashar júrgizildi. Qazirgi ýaqytta komanda damymaı jatyr, oıyn órnegi de kórinbeıdi. Men shuǵyl áreket jasaýǵa májbúr boldym», - dedi Artýr Smaǵulov.
Klýb búgin reseılik bas bapker Vladımır Mamınovty da qyzmetinen bosatty.
«Jyldyń basynda jańa maýsymda komandany Vladımır Mamınov jattyqtyrady degen sheshim shyqqan edi. Alǵashqy oqý-jattyǵý jıyndarynan soń komandanyń jaǵdaıy qanaǵattandyrmady. Joldastyq kezdesýler men komandanyń qaralymyndaǵy jańa oıynshylar kóńilden shyqpaı, jańa maýsymǵa degen daıyndyq alańdaýshylyq týdyrdy. «Aqtóbe«FK basqarma tóraǵasy reseılik mamanmen kelisimshartqa qol qoımaý týraly sheshim qabyldady. Mamınov Túrkııadaǵy komanda qosynynan ketti. Búgin komandaǵa jańa bas bapker tanystyrylady», - dep habarlady klýbtyń baspasóz qyzmeti.
⠀
