«Aqtóbe» fýtbol klýbyna jaýapty basshy Vasılevti ómirinde bir-aq ret kórgen
AQTÓBE. QazAqparat - «Aqtóbe» fýtbol klýbynyń burynǵy bas dırektory Dmıtrıı Vasılev búgin ózin jumysqa alýǵa kelisim berip, qujatqa qol qoıǵan dırektorlar keńesiniń tóraıymy Altyn Davletovamen sot zalynda kezdesti, dep habarlaıdy QazAqparat tilshisi.
№2 Aqtóbe qalalyq sotynda «Aqtóbe» FK burynǵy bas dırektory Dmıtrıı Vasılev pen oblystyq dene shynyqtyrý jáne sport basqarmasy basshysynyń qyzmetin atqarǵan Eskendirbek Mahanovqa qatysty sot otyrysy jalǵasty. Ekeýi Qylmystyq kodekstiń «Senip tapsyrylǵan bóten múlikti ıemdenip alý nemese talan tarajǵa salý», «Bılik nemese laýazymdylyq ókilettilikterdi asyra paıdalaný» baptary boıynsha aıyptalyp jatyr.
Keshe prokýror Elýbek Talasov aıyptaý qorytyndysyn oqyp, Vasılevtiń aı saıyn 4 mıllıon teńge jalaqy alyp otyrǵanyn málimdegen bolatyn. Al shtattyq keste boıynsha onyń jalaqysy 350 myń teńge bolýy tıis.
Búgingi sot otyrysynda kýáger «Aqtóbe» FK» AQ-y dırektorlary keńesiniń tóraıymy Altyn Davletova jaýap berdi. Ol Dmıtrıı Vasılevti ómirinde bir-aq ret kórgenin aıtyp, qarjylyq suraqtardyń bárine esepshi men zańger jaýap beretinin jetkizdi.
«Dmıtrıı Vasılev 2015 jyldyń jeltoqsan aıynda maǵan jalaqysy 4 mıllıon teńge bolatyn eńbek kelisim shartymen keldi. Men oǵan qol qoıǵan joqpyn. Sodan keıin eshkim bul suraqpen qaıta aldyma kelgen emes. Iıa, Vasılevtiń jumys istep júrgenin bildim. Jalaqysy týraly bar aqparatty tek esepshi men zańger aıtady. Olar qaı qujatqa súıenip 4 mıllıon teńge jalaqy berdi? Men ony bilmeımin»,- dedi A.Davletova.
Sot protsesi kezinde jaýap bergen kýáger Altyn Davletova dırektorlar keńesiniń tóraıymy qyzmetin atqarǵanymen, klýbtyń qarjylyq, aýdıtorlyq jumystaryna aralaspaǵanyn málimdedi.Ony jumysqa qabyldaý týraly qujatqa 2015 jyldyń 4 jeltoqsanynda qol qoıǵan. Alaıda Vasılevtiń 4 mıllıon teńgelik jalaqysy jazýly kelisimshartpen qaı ýaqytta ózine kelgenin dál aıta almady.
«Men kýáger Altyn Davletovaǵa 2015 jyly barǵan emespin. Kezdesý 2016 jyly boldy. Ol kezde men klýbtyń 2017 jylǵy josparyn kórsetken edim. Sonymen qatar, men eki ret dırektorlar keńesine qatysqan ekenmin. Qujattary bar. Biraq keńes otyrysyna qatysqan joqpyn, barmadym. Dırektorlar keńesiniń ózi oıdan shyǵarylǵan»,- dedi Dmıtrıı Vasılev sot zalynda. Keıin ákimdiktegi tirkeý kitapshasyn suratý, ujymdyq kelisimshartty oqýǵa ótinish bildirdi.
Aıta keteıik, hattamaǵa sáıkes ujymdyq kelisimshart pen syıyaqy tóleý erejesi oqyldy. Syıaqy tóleý erejesinde «Aqtóbe» komandasy el chempıonatynda birinshi oryn alsa, oıynshylar, bapkerler men mamandarǵa 200 myńnan 7 mıllıon teńgege deıin syıaqy qarastyrylǵan eken. Qazaqstan Kýbogynyń kelesi kezeńine ótkeni úshin «Aqtóbe» klýby 1,5 mıllıon teńgege deıin, Eýropa Lıgasy irikteý kezeńiniń kelesi satysyna ótkeni úshin oıynshylar 41 mıllıon teńgege deıin, osy týrnırdiń pleı-off satysyna shyqsa, 50 mıllıon teńgege deıin syıaqy tólenedi dep kórsetilgen. El chempıonatynyń matchtaryndaǵy árbir jeńis úshin 20 myńnan 1,2 mıllıon teńgege deıin, teń esep bolsa osy syıaqynyń jartysy tólenedi dep jazylǵan kelisim shartta. Klýbtyń bas dırektoryna oıyndardaǵy jeńisi úshin 100 paıyz, teń esep úshin 50 paıyz syıaqy alýǵa quqyly bolǵan. Sot otyrysy ári qaraı jalǵasady.
