«Aqtóbe» fýtbol klýbyna jańa bas bapker keldi
NUR-SULTAN. QazAqparat – Reseılik maman Vladımır Mamınov «Aqtóbe» klýbynyń bas bapkeri retinde jumysqa kiristi, dep habarlaıdy QazAqparat tilshisi.
«Aqtóbe» fýtbol klýby málim etkenindeı, V.Mamınovpen kelisimshartqa qol qoıylǵan.
Komanda quramyn jasaqtaı bastaǵan jańa bas bapker «Aqtóbemen» birge jýyrda Túrkııada ótetin birinshi oqý-jattyǵý jıynyna attanatyn bolady.
V.Mamınov fýtbolshy retinde máskeýlik «Lokomotıv» quramynda 1992-2008 jyldary dop tepti.
Ózbekstan quramasynda da oınaǵan 45 jastaǵy V.Mamınov bapkerlik mansabyn «Lokomotıvte» bastap, bas bapkerdiń kómekshisi boldy. Ýaqytsha bas bapkerlik mindetin atqarǵan ol keıin Qazannyń «Rýbın» klýbyna aýysty. 2014 jyldan bastap «Hımkı», «Solıarıs» (Máskeý), «Tıýmen» klýbtaryn bas bapker retinde jattyqtyrdy.
Kezinde bes márte el chempıony, úsh retten kúmis jáne qola júldeger atanǵan «Aqtóbe» ótken maýsymda premer-lıgadan túsip qalǵan bolatyn. Bıyl V.Mamınovtyń jetekshiligimen oǵan qaıta oralýdy maqsat etetini sózsiz.
Eske sala keteıik, budan buryn «Barselonanyń» bas bapkeri aýysqanyn, «Astanaǵa» Mıhal Bılektiń kelgenin jazǵan bolatynbyz.
