«Aqtóbe» fýtbol klýby jekeshelendiriledi
Aqtóbede 2016-2020 jyldarǵa arnalǵan jekeshelendirý josparyna 9 kommýnaldyq menshik nysany kirdi. Olardyń arasynda «Aqtóbe» fýtbol klýby men Qobylandy batyr atyndaǵy ortalyq stadıon bar.
«Ótken jyly tazalyq jumystaryn júrgizetin, qoqys jınaıtyn «Tazalyq» memlekettik-kommýnaldyq kásiporynyn úsh ret satýǵa qoıyp, ótpeı qaldy. Qazirgi ýaqytta kásiporyndy joıý jumystary júrip jatyr. Bıyl taǵy 6 kásiporyn jekeshelendiriledi. Olardyń arasynda qala ishindegi tazalyqqa jaýapty «Aqtóbe Taza Qala» mekemesi men «Namys» sporttyq oıyn túrleri klýby, «Aqtóbe-agroservıs» JShS-y bar. Bul kásiporyndar 100 paıyz memleketke tıesili boldy. Al «Aqtóbe oblystyq memlekettik-jekeshelik seriktestiktiń aımaqtyq ortalyǵy» JShS-nyń 51 paıyzdyq úlesi satylady. «Aqtóbe» aımaqtyq ındýstrıaldy tehnoparkindegi memleket úlesi 30 paıyz. Sol bóligi ǵana satýǵa shyǵarylady. «Hromtaý - Tazalyq» mekemesiniń 49 paıyzdyq úlesi de jekeshelendiriledi. Qazirgi ýaqytta baǵalaý jumystary júrip jatyr. Tek «Aqtóbe Taza Qala» JShS-y 355 mıllıon teńgege satyldy. Iesi bir jyldan keıin jekeshelendiredi»,- dedi Aqtóbe oblystyq qarjy basqarmasynyń basshysy Gúlqasıma Sýentaeva.
Jekeshelendirýge qoıylǵan kásiporyndar arasynda «Aqtóbe» fýtbol klýby men Qobylandy batyr atyndaǵy ortalyq stadıon da bar.
«Eki memlekettik-kommýnaldyq kásiporyn 2018 jyly jekeshelendiriledi. Quny ázirge belgisiz. Baǵalaýshylar Aqtóbe oblystyq dene shynyqtyrý jáne sport basqarmasynan qujattardy alyp, keıin eki nysannyń negizgi qunyn anyqtaıdy. Sodan keıin satýǵa shyǵarylady. Qazirgi ýaqytta «Aqtóbe» fýtbol klýbyna jyl saıyn 2 mıllıard teńge aýdarylyp otyr. Klýbtyń qaryzy týraly bilmeımin»,- dedi Gúlqasıma Sýentaeva.
