«Aqtóbe» fýtbol klýbynyń jańa basqarma tóraǵasy aldaǵy josparymen bólisti
AQTÓBE. KAZINFORM – Búgin «Aqtóbe» FK resmı túrde jekemenshikke ótti. Qazaq Stroy Properties kompanııasy klýbtyń basqarma tóraǵasy qyzmetine Arman Ospanovty taǵaıyndady.
«Aqtóbe» fýtbol klýby búgin baspasóz máslıhatyn ótkizip, jańa basshyny tanystyrdy. Klýb Qazaq Stroy Properties kompanııasynyń jekemenshigine ótip, ony Arman Ospanov basqarady. Tóraǵa óńirde baspasóz máslıhatyn ótkizip, aldaǵy josparymen bólisti.
– Klýb jankúıerler úshin, elimizdiń sportsúıer qaýymy úshin óte mańyzdy. «Aqtóbe» fýtbol klýbyna kelýimizdiń ózi kezdeısoq emes. Bul – ınvestıtsııa kózi ǵana emes, jaýapkershilik. «Aqtóbe» komandasy bıyl, aldaǵy ýaqytta da joǵary nátıje kórsetip, chempııondyqtan úmitti bolýy tıis. Únemi Eýrokýboktarda oınaýy qajet. Biz arnaıy strategııa quryp, bıýdjetti josparladyq. Sonymen birge jergilikti oıynshylarǵa, jergilikti mamandarǵa basymdyq beremiz. Eýropalyq úlgidegi zamanaýı fýtbol bazasyn salýdy josparlap otyrmyz. Fýtbol akademııasyn damytyp, dárigerler quramyn jańartamyz. Qazirdiń ózinde elimizdiń eń myqty mamandary jumysqa qabyldandy, - dedi «Aqtóbe» fýtbol klýbynyń basqarma tóraǵasy Arman Ospanov.
Fýtbolshylar oqý-jattyqý jıyndaryn Túrkııada ótkizedi. Olardyń arasynda jergilikti jastar quramynda oınaǵan talantty oıynshylar da bar.
Fýtbol klýby baspasóz qyzmetiniń habarlaýynsha, 2030 jylǵa deıingi jospar quryldy. Naqtyraq aıtsaq, 2026 jyl «Aqtóbe» FK-y Qazaqstan Premer-lıgasynyń úshtigine enip, Qazaqstan kýbogyn ıelenýi tıis. Al 2027 jyl chempıondyq jáne eýrokýboktardyń negizgi kezeńine shyǵýdy josparlap otyr. Sonymen birge UEFA týrnırlerine turaqty qatysýdy maqsat etti. Ol úshin Qazaq Stroy Properties kompanııasy ınvestıtsııa salady.
Baspasóz konferentsııasy kezinde «Aqtóbe» FK-nyń «13 sektor» jankúıerleri kezdesýge kirdi. Alaıda basshylyq olarmen jeke kezdesetinin aıtty.
Aıta keteıik, fýtbol klýby Ortalyq stadıondy jalǵa alady. Klýb jekege ótse de bıyl bıýdjetten 1,9 mlrd teńge qarastyryldy. Qarjynyń kóbi balalar men jastarǵa, qyzdar komandasyna baǵyttalady.
Buǵan deıin «Aqtóbe» fýtbol klýbynyń aýktsıondaǵy alǵashqy quny belgili bolǵanyn jazǵanbyz.