«Aqtóbe» fýtbol klýbynyń ıesi anyqtaldy

AQTÓBE. KAZINFORM - Fýtbol klýbynyń ıesi - «Qazaq Stroy» kompanııasynyń basshysy, quryltaıshysy Nurlan Artyqbaev. Klýbtyń balanstyq quny - 200 mln teńge.

«Aqtóbe» fýtbol klýbynyń jańa ıesi týraly naqty aqparat búgin Ortalyq kommýnıkatsııalar qyzmetinde aıtyldy. Klýbqa aqtóbelik jankúıer, kásipker ıelik etti. Qujat birer aıda tolyq rásimdeledi.

- Jekeshelendirý - tikeleı Prezıdent tapsyrmasy. Bıýdjetten qarjy bólinbeıdi, elimizdiń qaltaly azamattary alyp, klýbty jetildiredi. Klýbqa qyzyǵýshylyq tanylyp, óz úlesin qosamyn degen kásipker anyqtaldy. Ol - «Qazaq Stroy» kompanııasynyń basshysy, quryltaıshysy Nurlan Artyqbaev. Aqtóbelik, kishkentaı kezde «Aqtóbe» fýtbol klýbyna jankúıer bolyp, ata-anasymen stadıonǵa barǵan. Ol sol kezde bolashaqta múmkindik bolsa, úles qosamyn dep armandaǵan. Ózi habarlasyp, Prezıdenttiń tapsyrmasyn júzege asyrýǵa daıyn ekenin bildirdi. Endi bir-eki aıdyń kóleminde qujatty tolyq aıaqtaımyz dep josparlap otyrmyz. Endi qalaı bolatynyn, klýbqa qansha bólinetinin kásipkerdiń komandasy aıtady. Árıne biz tys qalmaımyz, qajetti ınfraqurylym, sonyń ishinde balalar, jasóspirimder fýtboly basty nazarda bolady. Balalar óskende úlken sportqa qadamyn osy kásipkermen birge júzege asyrady, - dedi Aqtóbe oblysynyń ákimi Ashat Shaharov.

Óńir basshysynyń aıtýynsha, baǵalaý jumystary júrgizildi. Klýbtyń balanstyq quny — 200 mln teńge. Sonymen birge 35 myń oryndyq stadıon qurylysy týraly da aqparat berdi. 

— Stadıon qurylysy kezinde FIFA talaptaryn oryndaý ońaı emes. Qomaqty qarjyny talap etedi. 

«Qansha oryndyq salamyz» degen kezde biz Eýrokýbok pen jergilikti chempıonattaǵy suranysqa súıendik. Alǵashqysyna 160 myń, keıingisine suranys 50-55 myńǵa deıin jetedi. Sondyqtan 35 myń oryndyq stadıon salýǵa bet burdyq. Qurylysshylardyń aıtýynsha, eki jylda júzege asyrýǵa bolady, — dedi Ashat Shaharov. 

Aıta keteıik, Qyzylorda fýtbol klýby jeke menshikke ótti.