«Aqtóbe» fýtbol klýbynyń bıylǵy bıýdjeti belgili boldy
AQTÓBE. KAZINFORM — Bıyl «Aqtóbe» fýtbol klýbyna 2,4 mlrd teńge bólindi. Legıonerler jalaqysyna bıýdjetten tys qarjy qarastyrylady.
Aqtóbe oblystyq dene shynyqtyrý jáne sport basqarmasyna basshy bolyp jańadan taǵaıyndalǵan Meırambek Mahambetov 2025 jyldyń josparyn bólisti. Bıyl Aqtóbedegi Altyn orda turǵyn alabynda múgedektigi bar adamdarǵa arnalǵan zamanaýı sport kesheni ashylady.
Syıymdylyǵy 35 myń oryndyq stadıon qurylysy bastalady. Sonymen birge 5 myń adamǵa arnalǵan Sport arenasy salynady. Munda basseın, kórkem jáne sporttyq gımnastıka zaldary boldy. Qurylystan bólek óńirdegi sport komandalaryna da qomaqty qarjy qarastyryldy.
— Bıyl «Aqtóbe» fýtbol klýbyna 2,4 mlrd teńge bólindi. Qazaqstan chempıonaty, Qazaqstan Kýboginde joǵary jetistikterge jetý talaby qoıylyp otyr. Sonymen birge halyqarylyq jarystar bar. Qazirgi kezde legıonerlerge jalaqy tóleýge qatysty ózgeristiń qujatyn kútip otyrmyz. Zań normalary qolǵa tıgen soń bıýdjetten tys jalaqy tóleý qarastyrylady. Bul baǵytta jumys júrip jatyr. Al shaǵyn fýtboldan eresekter komandasyna 450 mln teńge, balalar fýtbol ortalyǵyna 300 mln, áıelder fýtbolyna 100 mln teńge bólindi, — dedi Aqtóbe oblystyq dene shynyqtyrý jáne sport basqarmasynyń basshysy Meırambek Mahambetov.
Al hokkeı klýbynyń bıýdjeti 1 mlrd 290 mln teńgeni qurap otyr. Eresekterge 620 mln, jastarǵa 340 mln, akademııaǵa 330 mln teńge qarastyrylǵan. Munda da endi legıonerlerge bıýdjet qarjysy jumsalmaıdy. Basketbol komandasyna 136 mln teńge bólindi. Onyń 91 mln teńgesi jastar komandasyna, 45 mln teńge áıelder komandasyna berildi. Jalpy Aqtóbe oblysy boıynsha sport salasyna bıyl 21 mlrd teńge bólindi.
Eske salsaq, Májilis «Qazaqstan Respýblıkasynyń keıbir zańnamalyq aktilerine dene shynyqtyrý jáne sport, sondaı-aq normalardyń artyq (shamadan tys) zańnamalyq reglamenttelýin bolǵyzbaý máseleleri boıynsha ózgerister men tolyqtyrýlar engizý týraly» Qazaqstan Respýblıkasy Zańyn ekinshi oqylymda qabyldady. Jańa zańda legıonerlerge memleket bıýdjetinen de kvazımemlekettik sektordyń bıýdjeti esebinen de qarjy bólýge tyıym salatyn norma bar.