«Aqtóbe» fýtbol klýbynyń basshylary 250 mln teńge qarajat jymqyrǵan

AQTÓBE. KAZINFORM — Oblys prokýratýrasy Bas prokýratýranyń tapsyrmasy boıynsha Aqtóbe fýtbol klýbynyń qyzmetin tekserdi.

Tekseris barysynda «Aqtóbe» fýtbol klýbynyń basshylary oıynshylardyń tamaǵy men áýe tasymalyna bólingen 250 mln teńgege qarjysyn maqsatty jumsamaı, jep qoıǵany anyqtaldy. 

Oıynshylardyń tamaqtanýyna bólingen qarajatty klýb qyzmetkerleri jeke qajettilikterine jumsaǵan.

— Tekserý qorytyndysy boıynsha oblys prokýratýrasy Qylmystyq kodekstiń 189-babynyń 4-bóliginiń 2) tarmaǵy (asa iri mólsherde senip tapsyrylǵan bóten múlikti jymqyrý), 361-babynyń 4-bóliginiń 1) tarmaǵy (laýazymdyq ókilettikterdi teris paıdalaný) jáne 190-babynyń 4-bóliginiń 2) tarmaǵy (alaıaqtyq) boıynsha 3 sotqa deıingi tergep-tekserýdi bastady, — delingen habarlamada.

Qylmystyq ister tergep-tekserý amaldaryn júrgizý úshin Sybaılas jemqorlyqqa qarsy qyzmetke joldandy.

Іsterdiń tergelýi oblys prokýratýrasynyń baqylaýynda.

Eske sala keteıik, Qazaqstanda jemqorlyq áreketterdi jarııalaıtyn portal iske qosylǵan bolatyn.