«Aqtóbe» fýtbol klýbynyń aýktsıondaǵy alǵashqy quny belgili boldy
AQTÓBE. KAZINFORM – Mamandar klýbty 364, 3 mln teńgege baǵalap berdi. Klýb búgin aýktsıonǵa shyǵarylady.
Búgin oblystyq máslıhat depýtattary kópshilik tyńdaý ótkizdi. Onda «Aqtóbe» FK-yn jekeshelendirýge berý usynysy qaraldy.
– «Aqtóbe» FK-y 2020 jyly jekeshelendirý tizimine kirdi. Bıyl klýbqa baǵalaý júrgizilip, quny 364 mln 352 myń teńge dep esepteldi. Aýktsıon kezinde alǵashqy quny osy bolady. Klýb búgin aýktsıonǵa qoıylady. Habarlama 15 kún boıy turady. Kez kelgen adam qatysa alady, - dedi Aqtóbe oblystyq qarjy basqarmasynyń basshysy Erik Tursynǵalıev.
Onyń aıtýynsha, klýbta eshqandaı da múlik joq. Tek eki avtobýs pen orgtehnıka esepke alyndy. Al ózgesi oıynshylarmen aradaǵy kelisimshart, jattyqtyrýshylar quramy. Sonymen birge baǵalaý kezinde «Aqtóbe» FK-nyń bes dúrkin el chempıony bolǵany eskerildi.
– Aldyn ala kelisim bolmady, biraq qyzyǵýshylar bar. Qansha adam bar ekenin aıta almaımyn. Maǵan kelip, eshkim suramady. Aýktsıon elektrondy túrde ótedi. Jeńimpaz E-Qazyna platformasy arqyly anyqtalady. Qazirgi kezde klýb qalypty túrde jumysyn jalǵastyryp jatyr. Sebebi aýktsıonǵa shyqqanymen oǵan kim qatysatynyn, jeńimpazdy4 kim bolatynyn bilmeımiz. Eger anyqtalmasa jumys burynǵysynsha jalǵasady. Al aýktsıon arqyly jeńimpaz anyqtalsa, satyp alǵan ıesi sheshim qabyldaıdy, - dedi Erik Tursynǵalıev.
Aqtóbe oblysy ákimdigi fýtbolǵa qarjy bólýdi jalǵastyrady. Tek qarjylandyrý kólemi qysqarady.
– 2025 jyly fýtbolǵa 3,5 mlrd teńge jumsaldy. 2026 jyly 1,9 mlrd teńge qarastyrylyp otyr. Únem - 1,5 mlrd teńge. Jyl ótken saıyn osylaı qysqara beredi. Qazir biz balalar arasyndaǵy fýtbolǵa basymdyq berip otyrmyz. Balalar akademııasyna 260 mln teńge bólinse, keler jylǵa 400 mln teńge qarastyryldy. Sonymen birge áıelder komandasy da bar. Fýtzaldy da umytpaımyz, - dedi Aqtóbe oblystyq dene shynyqtyrý jáne sport basqarmasynyń basshysy Meırambek Mahambetov.
Aıta keteıik, «Aqtóbe» FK ortalyq stadıondy jalǵa alady. Sebebi bul – oblystyq dene shynyqtyrý jáne sport basqarmasyna qarasty sport mektebiniń teńgeriminde. Al fýtbol klýbynyń jańa ıesi basshylyq quramy men jattyqtyrýshyny, oıynshylardy ózi anyqtaı alady. Degenmen ákimdik qyzmet salasyn ózgertpeý, fýtbol klýbyn el ishindegi resmı oıyndarǵa qatystyrý, sporttyq ınfraqurylymmen qamtý jáne olardyń shyǵynyn óteý, issaparǵa jiberý talaptarynyń oryndalýyn basta talap etip qoıdy. Sheteldik legıonerlerge toqtaý qoıa almaıdy.
Eske salsaq, Aqtóbe oblysynyń ákim Ashat Shaharov buǵan deıin fýtbol klýbynyń ıesi «Qazaq Stroy» kompanııasynyń basshysy, quryltaıshysy Nurlan Artyqbaev ekenin aıtty.