«Aqtóbe» FK oıynshylar aldyndaǵy qaryzdy tolyq ótedi - Ońdasyn Orazalın
AQTÓBE. QazAqparat - «Aqtóbe» FK oıynshylar aldyndaǵy qaryzdy tolyq ótedi. Fýtbol klýbyn jekeshelendirý isi keıingi shegerildi. Bul týraly Ortalyq kommýnıkatsııalar qyzmetinde oblys ákimi Ońdasyn Orazalın aıtty, dep habarlaıdy QazAqparat tilshisi.
«Ótken jyly «Aqtóbe» FK qıyn kezeńdi ótkerdi. Uıymdastyrý, qarjylandyrý arqyly komanda qaıta jasaqtaldy. Birinshi lıgadan Premer-Lıgaǵa qaıta oraldy. Jankúıerler qýanyshty. Aýdandardy aralaǵan kezde olardyń da «Aqtóbe» FK erteńine alańdaıtynyn, jany ashıtynyn bildim. Zeınetkerler, jankúıerler oıyn bolatyn kúni taksı jaldap, arnaıy keledi eken. Sol adamdardyń senimin aqtaý - bizdiń mindetimiz. Qazirgi kezde «Aqtóbe» FK oıynshylarǵa qaryz emes. Salyq ta ýaqtyly tólendi. Qazir bir oıynshymen arada sot otyrysy ótip jatyr. Bir mámilege kelemiz degen senim bar», - dedi Ońdasyn Orazalın.
Sonymen birge fýtboldy qoldaý maqsatynda qosymsha alań jóndelip, onda qysy-jazy jattyǵý jasaýǵa jaǵdaı jasaldy. Aldaǵy ýaqytta Ortalyq stadıon jóndeledi.
«Ortalyq stadıon fýtbol klýbyna senimgerlik basqarýǵa berildi. Al qarjy tek «Aqtóbe» FK emes, shaǵyn fýtbol, balalar jáne jasóspirimder úıirmesine de beriledi. Keler jyly ońtaılandyrý jumysy jalǵasady. Qarjylandyrý kezinde demeýshiler kómegine júginemiz», - dedi óńir basshysy.
