«Aqtóbe» FK fanaty ulynyń tusaýyn Samat Smakovqa kestirdi

«Aqtóbe» fýtbol klýbynyń jankúıerleri, Samat Smakovtyń fanattary búgin erekshe qurmetke ıe boldy. Fýtbolshy ózi kezdesý ótkizip, aqtóbelikterge qoltańba berip, birge sýretke tústi. Al Gúlfara Dáýletova nemeresi Narıman Nurlannyń tusaýyn kestirdi.

«Ulym «balamnyń tusaýyn fýtbolshyǵa kestiremin» dep aıtqanda qaljyńdap júr dep oıladym. Ulym Nuǵmen fýtbol oınaǵandy unatady ári jankúıer. Qýanyshtymyz. Samat Smakov ótinishimizdi birden qabyldap, kelisimin berdi. Aldyn ala kelip, daıyndalyp, eki saǵat kúttik. Nemeremniń joly bolsyn dep tilek aıtamyn»,- dedi aqtóbelik Gúlfara Dáýletova. Kishkentaı Narımannyń tusaýyn kestirip, syılyq jasaǵan otbasy fýtbolshyǵa óz alǵysyn bildirdi.

Aıta keteıik, búgin fýtbolǵa jany qumar, Samat Smakovtyń sheberligin shyn baǵalaıtyndar óz esimderin jazdyryp, ózderin alańdatqan suraqtarǵa jaýap aldy.