«Aqtóbe» FK Eýropa Lıgasynda «Gandzasardy» utty
ASTANA. 5 shilde. QazAqparat - Eýropa Lıgasynyń bastapqy irikteý kezeńiniń alǵashqy matchynda Kapan (Armenııa) qalasynyń «Gandzasar» quramasy óz alańynda «Aqtóbelik» aıaq dopshylardy qabyldady.
Bul týraly Vesti.kz jazdy.
Býkmekerler oıyn aldynda qazaqstandyq quramaǵa basymdyq berdi. Alaıda alǵashqy taımda Vladımır Nıkıtenkonyń shákirtteri sheberlikterin kórsete almady. Jankúıerler eki quramanyń da sylbyr oıynyn baqylap, alǵashqy taımda esep sol kúıi ashylmady - 0:0.
Kezdesýdiń ekinshi bóliginde «Aqtóbeniń» bapkeri shabýyldy kúsheıtýdi uıǵaryp, alańǵa Emıl Kenjısarıevtiń ornyna klýbtyń jańa múshesi Sergeı Davydovty shyǵardy. Bul sheshim ózin aqtady desek te bolady. Oıynnyń 65-inshi mınýtynda Marat Haırýllınniń bergen dobyn Davydov dál nysanaǵa darytty.
78-inshi mınýtta Ashat Taǵybergen de sheberligin tanytty. Biraq qazaqstandyq qurama 90-ynshy mınýtta óz qaqpasyn qorǵaı almaı, Artak Dashıan óz esepterin ashty.
Nátıjesinde syrt alańda óner kórsetken jerlesterimiz 2:1 esebimen armenııalyq klýbty qapy qaldyrdy jáne olarda týrnırdi jalǵastyrýǵa jaqsy múmkindik bar. Jaýapty kezdesý 11 shilde kúni Aqtóbe qalasynda ótedi dep josparlanǵan.
