«Aqtóbe» FK eks-bas dırektory sot zalynan aqtalyp shyqty
AQTÓBE. QazAqparat - «Aqtóbe» FK eks-bas dırektory Maqsat Tıýmalıev sot zalynan aqtalyp shyqty. Oǵan 10 mıllıon teńgeniń jeıdesin satyp alýǵa zańsyz qarjy aýdardy dep aıyp taǵyldy, dep habarlaıdy QazAqparat tilshisi oblystyq sottyń baspasóz qyzmetine silteme jasap.
«Aqtóbe» FK eks-bas dırektory Maqsat Tıýmalıev pen jeke kásipker Farhat Imaevke qatysty tergeý alǵashynda Qylmystyq kodekstiń «Senip tapsymylǵan bóten múlikti ıemdenip alý nemese talan-tarajǵa salý» baby boıynsha júrdi. Keıin sot otyrysy kezinde aıyptaý aktisi ózgerip, Qylmystyq kodekstiń «Aldaý nemese senimdi teris paıdalaný jolymen múliktik zalal keltirý» babyna aýystyryldy. Búgin №2 Aqtóbe qalalyq soty «Aqtóbe» FK eks-bas dırektory Maqsat Tıýmalıevti qylmys quramy bolmaǵan soń aqtaýǵa úkim shyǵardy.
«Aıyptaý qorytyndysyna súıensek, «Aqtóbe» FK bas dırektory bolǵan Maqsat Tıýmalıev aldyn ala sóz baılasý arqyly «Aqtóbe Dızaın» JK-niń jetekshisi F.Imashevpen kelisim jasaıdy. «Memlekettik satyp alý týraly» Zańyn saqtamaı, ıaǵnı, memlekettik tapsyrys jasamaı 2017 jyldyń mamyr aıynda taýardy, 10 mıllıon teńgeniń jeıdesin jetkizý týraly kelisimshart jasaıdy. Tergeý organdarynyń aıtýynsha, taýar jetkizilmegen, al aqshany M.Tıýmalıev pen F.Imashev ózara bólip alǵan. Sot talqysy kezinde taǵylǵan aıyp tolyqqandy dáleldenbedi. Sot eki aıyptalýshyny aqtaýǵa úkim shyǵardy. Aıyptalýshylar aldaǵy ýaqytta qylmystyq jaýapkershilikke tartylǵany úshin moraldyq shyǵyn óndiredi alady», - dep habarlady oblystyq sottyń baspasóz qyzmeti.
Sot úkimi zańdy kúshine engen joq.
Eske salsaq, Maqsat Tıýmalıev 2017 jyly «Aqtóbe» FK bas dırektor bolyp taǵaıyndalyp, jumys istedi.
Foto: prosports.kz
