«Aqtóbe» FK 100 mln teńgege satylymǵa shyǵaryldy
AQTÓBE. QazAqparat - «Aqtóbe» FK satylymǵa shyǵaryldy. Fýtbol klýby 7 jylǵa senimgerlik basqarýǵa beriledi. Bul týraly QR Qarjy mınıstrligi Memlekettik múlik jáne jekeshelendirý komıtetiniń saıtyna silteme jasap QazAqparat tilshisi habarlaıdy.
QR Qarjy mınıstrligi Memlekettik múlik jáne jekeshelendirý komıtetiniń resmı saıyndaǵy málimetke súıensek, «Aqtóbe» fýtbol klýbyn satyp alýdy qalaǵan adam 15 mıllıon teńge alǵashqy jarna tóleýi tıis. Klýbtyń jalpy quny - 100 mıllıon teńge. Al qujattar 9 qazanǵa deıin qabyldanady. Konkýrstyń óz sharttary bar. Senimgerlik basqarýǵa alǵan adam «Aqtóbe» FK bas dırektory men bas bapkerin quryltaıshymen aqyldasyp, kelisip taǵaıyndaıdy. Ári jyljymaıtyn, jyljymaly múlikterdi satyp, jalǵa berip, kepilge qoıýǵa bolmaıdy. Quryltaıshy árbir 6 aı saıyn klýbtyń jaǵdaıy týraly esep alady.
«Premer-Lıganyń klýbtaryna qoıylatyn reglamentterge sáıkes klýbtyń barlyq qajetti jarystar men saıystarǵa qatysýyn qamtamasyz etý (QR Chempıonaty, QR Kýbogynyń oıyndary, Premer-Lıga klýbtarynyń qosalqy quramdary týrnıri, PFL Kýbogy, Premer-Lıga klýbtarynyń jasóspirimder men jastar komandalary, birinshi Lıga jáne mını fýtbol komandasy arasyndaǵy QR birinshiligi) sonymen qatar, ÝEFA saıystaryna qatysý týraly quqyǵyn alǵan jaǵdaıda jarysqa barý mindetteledi. Qazirgi kadrdyń 75 paıyzyn saqtap, ǵımaratqa jóndeý jumystaryn júrgizý qajet. Kredıtorlyq bereshekterin óteý, kredıtorlyq jáne debıtorlyq bereshektiń negizsiz qalyptasýyna jol bermeý, nysandy kredıtorlyq jáne debıtorlyq bereshekterimen qabyldaý, balalar, onyń ishinde Aqtóbe oblysynyń aýdandarynda balalar fýtbolyn damytý talaby qoıyldy»,- dep jazylǵan saıtta.
Buǵan deıin habarlaǵanymyzdaı, bas dırektor Samat Smaqov fýtbol klýbynyń qarjylyq jaǵdaıy kún saıyn qıyndaǵanyn málim etken edi.
Foto: instagram.com/fcaktobe_official
