«Aqtóbe» — «Ertis» matchy aldynda jol ýaqytsha jabylyp, qaýipsizdik kúsheıedi
AQTÓBE. KAZINFORM - Qaladaǵy Ábilqaıyr han dańǵyly boıymen jańkúıerler júrip ótedi. Polıtsııa tek stadıon aýmaǵyn emes, sol mańdaǵy úılerdiń mańyn da baqylaýǵa alady.
Búgin «Aqtóbe» FK óz alańynda «Ertisti» qabyldaıdy. Bul fýtbol klýbynyń osy maýsymda óz alańynda ótkizetin alǵashqy oıyny.
- Polıtsııa jankúıerlerge tártiptiń qatań baqylaýda bolatynyn jáne kez kelgen quqyq buzýshylyqqa jedel áreket etetinin eskertedi. Kórermen kóp jınalatyn bolǵan soń qaýipsizdik sharalary tek stadıon emes, oǵan jaqyn aımaqtarda da kúsheıtildi. Stadıonda tekserý júrgizetin ótkizý rejımi uıymdastyrylady, polıtsııa qyzmetkerleriniń sany arttyrylady. Sondaı-aq jaqyn mańdaǵy kósheler men qoǵamdyq oryndardy patrýldeý úshin qosymsha kúshter jumyldyrylady. Sonyń ishinde beınebaqylaý júıeleri arqyly da qadaǵalanady, - dep habarlady Aqtóbe oblystyq PD baspasóz qyzmeti.
Matchqa bılet alǵan kórermen de stadıonǵa erte kelýi kerek.
- Polıtsııa arandatýshylyq áreketter men tyıym salynǵan zattardy paıdalanǵany úshin zań aldynda jaýapkershilik qarastyrylǵanyn eskertedi jáne kez kelgen oqıǵaǵa jedel áreket etetinin habarlaıdy. Quqyq qorǵaý organdary jankúıerlerdi ózara qurmet kórsetip, mádenıettilik tanytyp, eshqandaı quqyq buzýshylyqsyz naǵyz sporttyq mereke atmosferasyn qalyptastyrýǵa shaqyrady, - dedi Aqtóbe oblystyq PD Ákimshilik polıtsııa basqarmasynyń bastyǵy Erkin Ótegen.
Buǵan deıin habarlaǵanymyzdaı, «Aqtóbe» komandasy syrt alańda elordalyq «Jeńis» komandasyna 0:1 esebimen ese jiberdi. Astanalyq klýb sapynan Saǵadat Tursynbaı soqqan jalǵyz gol kezdesý taǵdyryn sheshti.
